Туркиянинг Ўзбекистондаги элчихонасига 2019—2020 йилларда НАТО ва Ўзбекистон ўртасидаги алоқаларни мувофиқлаштириш ваколати берилди. «Бу ваколат 2017—2018 йилларда Ўзбекистоннинг НАТО билан алоқаларини мувофиқлаштирган Латвия элчихонасидан Туркия элчихонасига ўтказилди», – деб хабар беради Turon24 Латвия элчихонасига таяниб.
Эндиликда Туркия элчихонаси НАТОга аъзо давлат сифатида Ўзбекистонга иттифоқнинг сиёсати ҳақида хабар беради ва алоқаларни мувофиқлаштиради.
6 декабрь куни Тошкентда ўтказилган маросимда Латвия элчиси Михаил Попковс элчихона Ўзбекистон билан НАТО ўртасидаги алоқаларни мустаҳкамлашда бир қатор ишларни амалга оширганини таъкидлаган. Дипломатнинг сўзларига кўра, сўнгги икки йил давомида минтақавий чегаралар ва хавфсизлик соҳасида муҳим ислоҳотлар амалга оширилди. «Биз НАТОнинг Ўзбекистонга қизиқиши тобора ортиб бораётганига гувоҳ бўлмоқдамиз», – деган Латвия элчиси.
Туркиянинг Тошкентдаги элчиси Аҳмет Башар Шен дипломатик ваколатхонага юкланган вазифаларни бажаришга, Ўзбекистон ва НАТО ўртасида маълумотлар алмашишда кўприк вазифасини бажаришга тайёрлигини билдирган.
«Ўзбекистон НАТО учун муҳим мамлакатлардан бири ҳисобланади. Айнан Ўзбекистон орқали НАТО Афғонистонга инсонпарварлик ёрдамини етказиб туради», – деган Башар Шен.
Ўзбекистон 1993 йилдан бери НАТОнинг илмий тадбирларида ва «Тинчлик учун ҳамкорлик» дастурида қатнашмоқда.
Бугунги кунда НАТОга 29 та давлат аъзо, улардан учтаси собиқ Совет иттифоқи республикалари – Латвия, Литва ва Эстониядир. НАТО аъзоларининг ҳарбий харажатлари бутун дунё ҳарбий харажатларининг 70 фоизидан кўпроғини ташкил қилади.
Изоҳ (0)