Belarus prezidenti Aleksandr Lukashenko Rossiya gazi transportirovkasi juda yuqori ekanligini ma’lum qildi. Bu haqda “RIA Novosti” xabar bermoqda.
Rossiya yetakchisi Vladimir Putin unga javoban “ochiq va xolis” bahslashishni taklif qildi.
“Ittifoqchilik munosabatlarida energiya resurslari yetkazib beruvchilari va iste’molchilarining manfaatlari yo‘q. Yaxlit tizim bor — Yevroosiyo iqtisodiy ittifoqi”, — dedi Lukashenko Yevroosiyo oliy iqtisodiy kengashi majlisida.
Belarus yetakchisining so‘zlariga qaraganda, Yamalo-Nenetsk avtonom okrugidan Belarusga gaz transportirovkasi yuz kilometrga ming kubometr uchun uch dollarni tashkil etadi, Rossiyaning ichki tarifi esa uch baravar arzon — bir dollar atrofida.
“Oddiy savol — bunday vaziyatda qanday raqobatlashish mumkin?” — dedi Lukashenko.
Bunga javoban Rossiya prezidenti belaruslik hamkasbiga matbuotsiz bahslashishni taklif qildi.
“Bizda bu doim ochiq rejimda amalga oshiriladi, ochiqchasiga va xolisona”, — dedi u.
Putin joriy yilda Belarus uchun gaz narxi ming kub uchun 129 dollarni, 2019-yilda esa 127 dollarni tashkil etishi, bir vaqtning o‘zida Germaniya 250 dollar to‘lashiga e’tibor qaratdi.
U Yevroosiyo iqtisodiy ittifoqida reja ishlab chiqilganligi, unga ko‘ra, 2025-yilga kelib gaz, neft va neft mahsulotlarining yagona bozori tashkil etilishi lozimligini eslatib o‘tdi.
“Bugungi vaziyatga kelsak, bunda tarif muhim emas, gazning yakuniy narxi muhim. Bu masalada siz haqsiz, bu haqda o‘ylab ko‘rish lozim”, — deya xulosa qildi Putin.
Izoh (0)