Namanganda obuna o‘tgan yilga nisbatan 90 foizga tushib ketdi. Bu haqda “Turon 24” xabar bermoqda.
“O‘zbekiston pochtasi” AJ Namangan filiali obuna bo‘limi boshlig‘i Bahrom Boydadayevning aytishicha, gazeta-jurnallarga obuna ko‘rsatkichi o‘tgan yilgi holatning o‘rtacha 10 foizini tashkil etmoqda. Joriy yilning 25-noyabr holatiga ko‘ra, markaziy nashrlarga 3 916, mahalliy nashrlarga esa 6 194 nusxa obuna bo‘lindi.
Bu o‘tgan yilning shu kundagi holati bilan taqqoslaganda, mos ravishda markaziy nashrlarda 32 855 dona (11,9 foiz) va viloyat nashrlariga 64 853 dona (9,6 foiz)ni tashkil etgan.
“O‘zbekiston pochtasi” AJ Namangan filiali boshlig‘i Ilhomjon To‘xtaboyev buni asosan majburiy obuna ko‘rinishlariga barham berilayotgani bilan izohlamoqda. Lekin masalaning boshqa jihatlari ham bor. Pochtaning og‘ir iqtisodiy ahvoli va tahririyatlarga obuna mablag‘ini vaqtida berolmayotgani sababli obunani o‘z kuchi bilan uyushtirayotgan tahririyatlar ham kam emas.
“Yil boshida tirajimiz 5 336 dona bo‘lgan edi, shundan deyarli 4 mingtasini o‘zimiz harakat qilib obuna bo‘lishni amalga oshirdik, — deydi To‘raqo‘rg‘on tuman hokimligi gazetasi muharriri Zohida Kenjayeva. — Shunda ham tuman nashrlari orasida pochtadan eng ko‘p haqdor gazeta muharriri bo‘lsam kerak. Hozirda salkam 40 million so‘m pulimiz shu tashkilotda “cho‘kib” yotibdi. Bu o‘z-o‘zidan xodimlarga maosh to‘lash, bosmaxona bilan hisob-kitob qilish va boshqa jarayonlarga ta’sirini ko‘rsatmay qolmaydi”.
Zohida Kenjayevaning so‘zlariga ko‘ra, pochta hisobida turgan pul mablag‘ini ololmayotgani sabab obuna mavsumi oldidan pochtaga “Gazetamga obuna uyushtirmanglar, kerak emas” deb rasman xat ham yuborgan. Ikki yilcha avval “Matbuot tarqatuvchi” bilan ham shunday muammolar yuzaga kelavergani uchun aloqani to‘xtatgan. Pochta tomoni uning xatiga munosabat ham bildirmagan. Hozirda tahririyat o‘z kuchi bilan tashkil etgan obuna 1000 donaga ham yetmadi.
“O‘zbekiston pochtasi” AJ Namangan filiali bosh hisobchisi O‘rmonjon Egamov tashkilotning bugungi kunda mahalliy nashrlardan 600 million so‘mga yaqin qarzdorligini bildirdi: “Bu qarzdorlik yangi yilga qolmay bartaraf etiladi. Buni hisob-kitobini qilganmiz. Tahririyatlarni qiynab qo‘yganimizdan o‘zimiz ham xijolatdamiz”.
“O‘zbekiston pochtasi” AJ Namangan filiali boshlig‘i Ilhomjon To‘xtaboyevning aytishicha, filialdagi muammolarning bir uchi sohada moliyaviy barqarorlikni ta’minlab kelgan pensiya tarqatish hozirda Xalq bankiga berilgani bo‘lsa, yana biri ichki tekshiruvlar davomida aniqlangan qariyb 3 milliard so‘m atrofidagi kamomadning ta’siri bo‘lmoqda. Hozirda bu holat yuzasidan tergov harakatlari olib borilmoqda.
“Pensiya tarqatish qo‘limizdan chiqib ketdi deb qo‘l qovushtirib o‘tirganimiz yo‘q. Kommunal to‘lovlar bo‘yicha elektr, gaz, suv korxonalari bilan shartnomalar tuzganmiz, qolaversa, pochta, pul jo‘natmalari bor. Obuna bo‘yicha ham o‘zimiz xizmatlarimizni taklif qilib, banner, bukletlar tayyorladik, — deydi Ilhomjon To‘xtaboyev. — Tahririyatlar bilan yuzaga kelgan muammolar 2019 yilda takrorlanmaydi. Filialimizning 181 ta bo‘linmasi gazeta-jurnallarni o‘z vaqtida egalariga yetkazishga tayyor. Nashrlarga obuna dekabr oyida jonlanib qoladi, degan umiddaman”.
Namangan shahar hokimligining “Namangan sadosi” gazetasi muharriri Komiljon Fayziyev ham shundan umidvor. Hozircha nashrga 500 dona atrofida obuna to‘plangan:
“Rejamiz bu ko‘rsatkichni hech bo‘lmasa 5 ming donaga chiqarish, shunda gazeta yil oxirigacha muammolarsiz chop etilishi mumkin. Aslida bu raqam aholisi 500 ming kishidan oshadigan viloyat markazi uchun kam. Oldinlari ham farmoyish yoki taqsimotlarga tayanib qolmay, xodimlar bilan harakat qilganmiz, korxona-tashkilotlarga chiqqanmiz. Bu yil ham shunday bo‘lyapti”.
Namangandagi 50 dan ortiq nashrning oxirgi umidi mahalliy pochtada yil yakunida moliyaviy holatning o‘nglanishi, qolaversa, dekabrda obunaning jonlanishi bo‘lib turibdi.
Izoh (0)