Bir necha yildan buyon Haj ziyoratini ado etish uchun navbatda turgan fuqarolarning ko‘makka muhtoj kishilar taqdiriga qarab turmay yordam berishlari tahsinga sazovor, deyiladi O‘zbekiston musulmonlari idorasi xabarida. Shunday ko‘mak 7 yil ozodlikdan mahrum etilgan Sherzodbekka ko‘rsatildi.
Jahon iqtisodiyoti va diplomatiya universitetidagi o‘qishidan ajralgan, bir kasbning boshini ham tuta olmagan talaba, adashib diniy oqimlarga qo‘shilib qolgan. O‘zbekistonning nufuzli universitetida tahsil olgan va keyinchalik ozodlikdan mahrum etilgan Sherzodbek Toshkent shahar hokimligining jamoat va diniy tashkilotlar bilan aloqalar bo‘limi tavsiyasi va yordami bilan o‘qishi tiklandi.
O‘zA nashrining ma’lum qilishicha, uning 22 million so‘m miqdoridagi shartnoma pulini Haj safariga bir necha yillardan buyon navbat kutayotgan keksa yoshli fuqarolardan biri to‘lab berdi. Natijada Sherzod o‘z sevgan yo‘nalishida o‘qishini tiklashga erishdi. Unda ertangi kuniga umid paydo bo‘ldi. U hozirda tahsilni davom ettirib, kelajak uchun rejalar tuzmoqda.
Bundan tashqari, Davron aka ham salkam 19 yil panjara ortida o‘tirib, ozodlikka chiqdi. Qamalgan vaqtida endigina atak-chechak qilib yura boshlagan farzandlari bugun oila quray demoqda. O‘g‘ilni uylash, qizni uzatish kerak. Ammo, Davron akaning ham na hunari va puli bor. Ustiga ustak ozodlikdan mahrum bo‘lgan davrida sog‘lig‘i bo‘yicha ham muammolar orttirgan edi. Ammo Haj ziyorati orzusida bo‘lgan yoshi ulug‘ fuqarolardan biri unga yordam qo‘lini cho‘zdi. Davron kasalxonada yotib davolandi, haydovchilik kurslarida o‘qidi. Endilikda ko‘zida jarrohlik operatsiyalarini o‘tkazilishi kutilmoqda.
Izoh (0)