O‘zbekiston yil oxirigacha suveren kredit reytingiga ega bo‘lishni, 2019-yilning birinchi choragida esa tashqi bozorga obligatsiyalar chiqarishni rejalashtirmoqda. Bu haqda Toshkentda Jahon banki, Osiyo taraqqiyot banki, mamlakat hukumati, xalqaro biznes va ekspert hamjamiyati vakillari ishtirokida bo‘lib o‘tgan O‘zbekistonda 2019—2021-yillarga mo‘ljallangan tuzilmaviy islohotlar asosiy yo‘nalishlarining “yo‘l xaritasi” taqdimot-muhokamasida Bosh vazir o‘rinbosari, Moliya vaziri Jamshid Qo‘chqorov aytib o‘tdi, deb yozadi “Gazeta.uz”.
Uning aytishicha, ayni paytda hukumat Fitch, Moody’s va Standart & Poors kabi uchta reyting agentligi bilan ishlamoqda. “Albatta, ular bizga qanaqa baho berishini aytmayapti. Bizda xolisona minuslar ham plyuslar ham bor”, — dedi u.
Bosh vazir o‘rinbosari salbiy jihatlar qatorida O‘zbekiston YaIMning aholi jon boshiga nisbatan past qiymatini, shuningdek, mamlakatning qator reytinglardagi past pozitsiyasini tilga olgan bo‘lsa, ijobiy jihatlar sifatida tashqi qarzning kamligi (YaIMga nisbatan 24%), katta oltin-valyuta zaxiralari hamda islohotlarga nisbatan kuchli siyosiy irodani aytib o‘tdi.
O‘zbekiston hukumati tomonidan tashqi bozorga obligatsiyalar chiqarilishi muddati haqida gapirar ekan, 2019-yilning birinchi choragini ko‘rsatdi. “Bu yil amalga oshmaydi, investorlar o‘z kitoblarini yopib bo‘ldi”, — dedi vazir.
Izoh (0)