Ўзбекистон йил охиригача суверен кредит рейтингига эга бўлишни, 2019 йилнинг биринчи чорагида эса ташқи бозорга облигациялар чиқаришни режалаштирмоқда. Бу ҳақда Тошкентда Жаҳон банки, Осиё тараққиёт банки, мамлакат ҳукумати, халқаро бизнес ва эксперт ҳамжамияти вакиллари иштирокида бўлиб ўтган Ўзбекистонда 2019—2021 йилларга мўлжалланган тузилмавий ислоҳотлар асосий йўналишларининг «йўл харитаси» тақдимот-муҳокамасида Бош вазир ўринбосари, Молия вазири Жамшид Қўчқоров айтиб ўтди, деб ёзади «Газета.uz».
Унинг айтишича, айни пайтда ҳукумат Fitch, Moody’s ва Standart & Poors каби учта рейтинг агентлиги билан ишламоқда. «Албатта, улар бизга қанақа баҳо беришини айтмаяпти. Бизда холисона минуслар ҳам плюслар ҳам бор», — деди у.
Бош вазир ўринбосари салбий жиҳатлар қаторида Ўзбекистон ЯИМнинг аҳоли жон бошига нисбатан паст қийматини, шунингдек, мамлакатнинг қатор рейтинглардаги паст позициясини тилга олган бўлса, ижобий жиҳатлар сифатида ташқи қарзнинг камлиги (ЯИМга нисбатан 24%), катта олтин-валюта захиралари ҳамда ислоҳотларга нисбатан кучли сиёсий иродани айтиб ўтди.
Ўзбекистон ҳукумати томонидан ташқи бозорга облигациялар чиқарилиши муддати ҳақида гапирар экан, 2019 йилнинг биринчи чорагини кўрсатди. «Бу йил амалга ошмайди, инвесторлар ўз китобларини ёпиб бўлди», — деди вазир.
Изоҳ (0)