Samarqand viloyatining Urgut tumani jinoiy ishlar bo‘yicha sudi Qarshi tuman IIBning sobiq boshlig‘i Jahongir Rajabovni 2 yil ozodikdan cheklash jazosiga hukm qildi. Bu haqda “Gazeta.uz” xabar bermoqda.
Unga 3 yil davomida mansabdorlik lavozimlarini egallash ham man etildi. Rajabov JKning 206-moddasi 1-bandida ko‘zda tutilgan jinoyatni (“Mansab vakolatini suiste’mol qilish”) sodir etganlikda aybdor deb topildi.
2015-yil aprelidan 2018-yil 24-iyuligacha Qarshi tuman IIB boshlig‘i bo‘lib ishlagan Rajabov joriy yil 12-may, 12, 17 va 24-iyun kunlari g‘alla yig‘im-terimi rejasini bajarmagan bir necha fermer, jumladan, ayol kishini haqoratlagani va kaltaklagani qayd etilgan.
Sudlanuvchi o‘z aybini to‘liq tan oldi, qilmishidan pushaymon ekanligi va jabrlanuvchilarga tovon to‘lashga tayyorligini bildirdi. Shu bilan birga, fermerlarni “shaxsiy manfaati uchun kaltaklamaganligi”ni ta’kidladi.
Jahongir Rajabov Qarshi tumanining Mang‘it qishlog‘ida jazosini o‘taydigan bo‘ldi.
Izoh (0)