Zulfiya nomidagi davlat mukofoti uchun o‘tkazilgan ko‘rik-tanlovning Termiz shahar bosqichida nomzodni viloyat bosqichiga o‘tkazish evaziga 200 AQSh dollari so‘ragan shaxs pora olayotganda qo‘lga olindi. Bu haqda Bosh prokuratura huzuridagi departamentning Surxondaryo viloyati boshqarmasi matbuot xizmati ma’lum qildi, deya xabar beradi “Turon 24”.
Voqea 17-noyabr kuni Termiz shahrida ro‘y bergan. Pora olgan ayol Termiz shahar xalq ta’limi bo‘limining ma’naviy-axloqiy, tarbiya va bolalarni ijtimoiy himoya qilish sho‘basi mudiri vazifasida ishlab kelgan. U ismi oshkor etilmagan fuqaroga qizini Zulfiya nomidagi davlat mukofoti uchun o‘tkazilgan ko‘rik-tanlovning shahar bosqichidan viloyat bosqichiga o‘tkazib berishini aytgan. Buning uchun 200 AQSh dollari berishini talab qilgan.
Qonunbuzar pora olayotgan vaqtda departamentning Termiz tuman bo‘limi tomonidan ushlangan. Unga nisbatan jinoyat ishi qo‘zg‘atilgan. Ayni paytda tergov olib borilmoqda.
Ma’lum qilinishicha, jinoyat ustida qo‘lga olingan ayol oldin ham firibgarligi uchun sudlanib, 2017-yilning 5-iyulida jinoyat ishlari bo‘yicha Termiz shahar sudining hukmi bilan jinoiy javobgarlikka tortilgan.
Izoh (0)