Fransiya kompaniyasi Toshkentdagi Islom sivilizatsiyasi markazi loyihasini ishlab chiqishda ishtirok etadi

Qurilish vazirining o‘rinbosari Botir Zokirov boshchiligidagi delegatsiya Parijda safarda bo‘ldi. Bu haqda O‘zA xabar bermoqda.

Safar chog‘ida Fransiyaning Wilmotte & Associés kompaniyasi vakillari ishtirokida Toshkentda tashkil etilayotgan Islom sivilizatsiyasi markazi binosini qurilishi bilan bog‘liq masalalar yuzasidan uchrashuv bo‘lib o‘tdi.

Muzokaralar chog‘ida O‘zbekiston delegatsiyasi tomonidan Islom taraqqiyot markazining konsepsiyasi taqdimoti o‘tkazildi. Fransiyaning Wilmotte & Associés kompaniyasi bilan imzolangan bitim doirasida markaz loyihasini ishlab chiqish, ushbu me’moriy ansamblning ichki dizaynini o‘ziga xos tarzda yaratish bo‘yicha fikr almashildi.

Ushbu majmua xalqaro va tarixiy mezonlarga muvofiq quriladi hamda kutubxona, axborot-resurs markazi, akademik bo‘limlar, anjumanlar zali, ma’muriyat va boshqa binolarni o‘z ichiga oladi.