Farg‘ona viloyatida joriy yilning o‘tgan 10 oyida 668 nafar xotin-qiz tomonidan 603 ta jinoyat sodir etilgan. Bag‘dod, Dang‘ara, Buvayda va Yozyovon tumanida ayollar o‘rtasidagi jinoyatchilik soni oshgan, deya xabar bermoqda O‘zA.
Farg‘ona tumani “Yuqori gulshan” mahalla fuqarolar yig‘inida bo‘lib o‘tgan sayyor sud majlisida Yoqut Asilevaning jinoyat ishi ko‘rildi.
Sudlanuvchi 2018-yil 11-sentabr kuni soat 14.30 larda Farg‘ona tumani “Huvaydo” mahallasida bo‘layotgan to‘y marosimiga kirib, u yerda 2017-yilda tug‘ilgan O.Shermatovani tashqariga olib chiqib ketadi. “Damas” rusumli yo‘lovchi avtomashinada odamlar e’tiboridan chetroq ovloq joyga olib kelib, uning quloqlaridagi narxi 200 ming so‘m bo‘lgan bir juft tilla sirg‘ani yechib oladi.
O.Shermatovani xavfli ahvolga solib qo‘yib, ko‘chada qoldirib, voqea joyidan yashirinadi. Ichki ishlar idoralari xodimlari tomonidan mazkur jinoyat fosh etildi.
Jinoyat ishlari bo‘yicha Farg‘ona tuman sudi raisi F. Abduraimov tomonidan o‘tkazilgan keng jamoatchilik ishtirokidagi sayyor sudda Yoqut Asilevaning ana shu qilmishlari atroflicha ko‘rib chiqildi. Unga 5 yil ozodlikni cheklash bilan bog‘liq jazo tayinlandi.
Izoh (0)