Adliya vazirligi tomonidan nodavlat notijorat va diniy tashkilotlar faoliyatini takomillashtirishga qaratilgan qonun hujjatlari mazmun-mohiyatini tushuntirishga bag‘ishlangan matbuot anjumani o‘tkazildi. Bu haqda Adliya vazirligi Jamoatchilik bilan aloqalar bo‘limi xabar berdi.
Yangicha formatda o‘tkazilgan matbuot anjumanida ilk bor O‘zbekiston Respublikasi Prezidenti Administratsiyasi mas’ul xodimi, NNT va turli konfessiyadagi diniy tashkilotlar vakillari, xorijiy NNTlar vakolatxonalarining chet ellik xodimlari ham ishtirok etdi.
Anjumanda sohada qabul qilingan qonun hujjatlari tushuntirilib, 2018-yil nodavlat notijorat va diniy tashkilotlar faoliyatini yanada takomillashtirish bo‘yicha eng ko‘p normativ-huquqiy hujjatlar qabul qilingan yil sifatida mustaqil O‘zbekiston tarixida qolganligi alohida e’tirof etildi.
Bugungi kunda respublikada turli sohalarda 9 700 dan ortiq nodavlat notijorat tashkilotlari va 2200 dan ortiq diniy tashkilotlar va 1 500 dan ortiq OAVlar faoliyat ko‘rsatib kelmoqda.
Ta’kidlash joizki so‘nggi to‘qqiz oy davomida mamlakatimizda nodavlat notijorat va diniy tashkilotlar hamda fuqarolik jamiyatining boshqa institutlarini tashkil etish hamda ular faoliyatini qo‘llab-quvvatlash borasida keng ko‘lamli ishlar amalga oshirildi, jumladan ular faoliyatini tartibga soluvchi bir qator qonun hujjatlariga o‘zgartish va qo‘shichalar kiritilishi bilan birga, 15 ta yangi normativ-huquqiy hujjatlar qabul qilindi.
Xususan, 2018-yil 13-apreldan boshlab O‘zbekiston Respublikasi Adliya vazirligi nodavlat notijorat tashkilotlarining faoliyatini rivojlantirish sohasida davlat siyosatini amalga oshiradigan organ sifatida rasman e’tirof etildi.
Shuningdek, joriy yildan boshlab:
- NNT pensioner xodimlariga pensiya ularning mazkur tashkilotlardagi faoliyati yagona ish joyi bo‘lgan taqdirda, to‘liq to‘lanadi. “Nodavlat notijorat tashkilotlari uylari” tashkil etildi;
- mehnatga haq to‘lash fondini tadbirkorlik faoliyati bilan bog‘liq bo‘lmagan kelib tushgan mablag‘lar hisobidan shakllantiruvchi NNT uchun yagona ijtimoiy to‘lov stavkasi 25 foizdan 15 foizga tushurildi;
- jamoat fondi ma’muriy xarajatlarining yillik umumiy summasi fondning barcha xarajatlari summasining 30 foizidan oshmasligi kerakligi belgilandi;
- Nodavlat notijorat tashkilotlarining chet el fuqarolari bo‘lgan xodimlari akkreditatsiya kartochkasining yangi shakli tasdiqlandi. Unga ko‘ra, akkreditatsiya kartochkasining himoyalanganlik darajasi yanada oshirildi;
- Adliya vazirligi huzurida 17 kishilik nodavlat notijorat tashkilotlari vakillari, vazirlik faxriylari va yuridik fanlar doktoridan iborat Jamoatchilik kengashi tuzildi.
“Fuqarolik jamiyatini rivojlantirishga qo‘shgan hissasi uchun” ko‘krak nishoni tasdiqlandi.
O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita tuzilmasida Diniy-ijtimoiy jarayonlarni o‘rganish axborot-tahlil markazi, Oliy diniy-ma’rifiy ta’lim muassasasi shaklidagi Hadis ilmi maktabi, O‘zbekiston musulmonlari idorasi huzurida “Vaqf” xayriya jamoat fondi tashkil etilishi hamda mamlakatimiz dovrug‘ini jahon miqyosida keng yoyish ishiga munosib hissa qo‘shib kelayotgan shaxslarni rag‘batlantirish maqsadida “Imom Buxoriy” davlat mukofotini ta’sis etish belgilab olindi.
Diniy tashkilotlarni davlat ro‘yxatidan o‘tkazish tartibi soddalashtirildi, ro‘yxatdan o‘tkazishda to‘lanadigan davlat boji 5 martaga kamaytirildi.
Shu bilan birga anjumanda ishtirokchilar joylarda tashkil etilayotgan NNT uylari, ularning holati va topshirilishiga doir masalalar, “Fuqarolik jamiyatini rivojlantirishga qo‘shgan hissasi uchun” ko‘krak nishonini aynan qanday hollarda va ularning qaysi natijalariga qarab berilishi borasida o‘zlarini qiziqtirgan savollariga atroflicha javob oldi.
Matbuot anjumani qizg‘in muhokama ruhida o‘tkazildi va vazirlik tomonidan kelgusida bu kabi tadbirlar joylarda hamkor nodavlat notijorat va diniy tashkilotlar bilan birga o‘tkazilishi belgilab olindi.
Izoh (0)