Davlat xizmatlari agentligi Samarqand viloyat boshqarmasi tuman va shahar Davlat xizmatlari markazi xodimlari tomonidan bir kunda 955 ta o‘zboshimchalik bilan qurilgan turar joy binosiga mulk huquqini e’tirof etish yuzasidan arizalar qabul qilingan. Mazkur arizalar tegishli tartibda o‘rganib chiqish uchun ishchi guruhga yuborilgan. Bu haqida “Daryo” muxbiri Farhod Norbo‘tayev xabar bermoqda.
“Davlat xizmatlari markazi xodimlari tomonidan 2018-yil Samarqand viloyatining olis va yaqin hududlarida aholi o‘rtasida targ‘ibot tadbirlari hamda sayyor uchrashuvlar o‘tkazilmoqda. Fuqarolar o‘zboshimchalik bilan qurilgan turar joy binolariga va imoratlarga nisbatan yuridik maqom, ya’ni egalik huquqini e’tirof etish maqsadida hududlardagi Davlat xizmatlari markazlariga murojaat qilishlari mumkin”, – deydi Boshqarma mas’ul xodimi Alisher Primov.
Mazkur murojaat bepul va murojaat qilingan sanadan boshlab 11 kun muddatda tuman va shahar hokimliklari qoshida tuzilgan ishchi komissiya a’zolari tomonidan o‘rganib chiqiladi. Murojaatga ijobiy xulosa berilganidan so‘ng hokim qarori chiqarilishi uchun eng kam oylik ish haqining 5 baravari miqdorida davlat boji to‘lanadi.
Ma’lumot uchun, 2018-yil 20-apreldagi “O‘zbekiston Respublikasi Prezidentining “Fuqarolarni ijtimoiy qo‘llab-quvvatlash bo‘yicha qo‘shimcha chora-tadbirlar hamda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha bir martalik umumdavlat aksiyasini o‘tkazish to‘g‘risida” PF-5421-son Farmoni asosida o‘tkazilayotgan aksiya 2019-yilning 1-mayiga qadar davom etadi. Ushbu muddat tugaganidan so‘ng o‘zboshimchalik bilan qurilgan va mulk huquqi e’tirof etilmagan turar joylarning egalariga nisabatan keskin chora ko‘rilishi kutilmoqda.
Izoh (0)