Давлат хизматлари агентлиги Самарқанд вилоят бошқармаси туман ва шаҳар Давлат хизматлари маркази ходимлари томонидан бир кунда 955 та ўзбошимчалик билан қурилган турар жой биносига мулк ҳуқуқини эътироф этиш юзасидан аризалар қабул қилинган. Мазкур аризалар тегишли тартибда ўрганиб чиқиш учун ишчи гуруҳга юборилган. Бу ҳақида «Дарё» мухбири Фарҳод Норбўтаев хабар бермоқда.
«Давлат хизматлари маркази ходимлари томонидан 2018 йил Самарқанд вилоятининг олис ва яқин ҳудудларида аҳоли ўртасида тарғибот тадбирлари ҳамда сайёр учрашувлар ўтказилмоқда. Фуқаролар ўзбошимчалик билан қурилган турар жой биноларига ва иморатларга нисбатан юридик мақом, яъни эгалик ҳуқуқини эътироф этиш мақсадида ҳудудлардаги Давлат хизматлари марказларига мурожаат қилишлари мумкин», – дейди Бошқарма масъул ходими Алишер Примов.
Мазкур мурожаат бепул ва мурожаат қилинган санадан бошлаб 11 кун муддатда туман ва шаҳар ҳокимликлари қошида тузилган ишчи комиссия аъзолари томонидан ўрганиб чиқилади. Мурожаатга ижобий хулоса берилганидан сўнг ҳоким қарори чиқарилиши учун энг кам ойлик иш ҳақининг 5 баравари миқдорида давлат божи тўланади.
Маълумот учун, 2018 йил 20 апрелдаги «Ўзбекистон Республикаси Президентининг «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида» ПФ-5421-сон Фармони асосида ўтказилаётган акция 2019 йилнинг 1 майига қадар давом этади. Ушбу муддат тугаганидан сўнг ўзбошимчалик билан қурилган ва мулк ҳуқуқи эътироф этилмаган турар жойларнинг эгаларига нисабатан кескин чора кўрилиши кутилмоқда.
Изоҳ (0)