Farg‘ona viloyatidagi ayrim qishloq oilaviy poliklinikalarida bugungi kunda tibbiy xizmat ko‘rsatishda ko‘plab muammolar o‘z yechimini topganicha yo‘q. Birlamchi tibbiy-sanitariya yordami tizimi, ularning moddiy-texnik bazasi va malakali kadrlar bilan ta’minlanish darajasi talabga javob bermaydi, deya ma’lum qiladi O‘zA.
Yozyovon tumanida bugungi kunda tibbiyot sohasida amalga oshirilayotgan islohotlar oqsayotganligini guvohi bo‘lish mumkin. “Soybo‘yi” mahalla fuqarolar yig‘inidagi 33-qishloq oilaviy poliklinikasi joriy yilda ta’mirdan chiqarildi. Bundan aholi behad mamnun bo‘ldi. Biroq, ularning xursandchiligi uzoqqa cho‘zilmadi. Chunki bu yerda tibbiy xizmat ko‘rsatish uchun imkoniyatlar mavjud emas. Tor doiradagi mutaxassislardan faqat jarroh va stomatolog bor, xolos.
Mazkur oilaviy poliklinika 20 mingdan ortiq aholiga xizmat ko‘rsatadi. Tibbiy jihozlar yetarli emas, EKG apparati umuman ishlamaydi. Ta’mirlash ishlari hali ham o‘z yakuniga yetgani yo‘q. Poliklinikaga elektr ta’minotini yaxshilash maqsadida yangi transformator o‘rnatilishi kerak. Ming afsuski, transformator olib kelingan bo‘lsa-da, ba’zi bir muammolar sabab, o‘rnatilmay kelmoqda.
Avgust oyida bu tibbiyot maskanida tumanda birinchilardan bo‘lib, yagona elektron ro‘yxatga olish va internet tarmog‘i orqali shifokor qabuliga yozilish “elektron poliklinika” avtomatlashtirilgan axborot tizimi ishga tushirilgan edi. Ayni kunlarda bu tizim umuman ishlagani yo‘q. Barchasi xo‘jako‘rsinga tashkil etilgan ekan. Mazkur qishloq oilaviy poliklinika mudiri Bahrom Mamadayupovning aytishicha, bunga asosiy sabab internetga ulanish bilan bog‘liq muammolar.
Tuman ko‘p tarmoqli markaziy poliklinikasi o‘tgan yilda qurilib, ishga tushirilgan. Bu yerdagi holat ham bugungi kun talabiga umuman javob bermaydi. Shifokor qabuliga kirish uchun uzundan-uzun navbatlar har qanday kishini dilini xufton qiladi. Bu yerda ham ishga tushirilgan “elektron poliklinika” ishlamayapti.
— Ertalab kelganmiz, soat 12 bo‘lyaptiki, hali ham navbatda turibmiz, – deydi Nozim Ibrohimov. — Bizku mayli, mana bu ayollarni holatini bir ko‘ring.
Tuman tibbiyot birlashmasi boshlig‘i o‘rinbosari Ibrohim Yoqubov biz bilan suhbatda tumanda bir qator kadrlarning yetishmayotganini, ba’zi tibbiy jihozlarga ehtiyoj borligini aytib o‘tdi.
Umuman olganda, mahallalarda aholi sifatli tibbiy xizmat bilan to‘liq qamrab olinmagan. Ba’zida tibbiy ko‘riklar nomigagina tashkil etilmoqda. Qishloq oilaviy poliklinikasiga murojaat qilgan fuqarolar tor doiradagi mutaxassislarning yo‘qligi bois yana sarson bo‘lmoqda. Tumandagi mavjud 4 ta qishloq oilaviy poliklinikasida ham patronaj xizmatini takomillashtirish, har bir oilaga kirib borish va aholi salomatligidan xabardor bo‘lish, sog‘lom turmush tarzini keng targ‘ib etish kabi ishlarda mutasaddilar mas’uliyatini yetarli darajada, deb bo‘lmaydi.
Izoh (0)