O‘zbekiston Matbuot va axborot agentligida Shveysariyaning Muller Martini savdo menejeri G.Samoylov hamda ushbu kompaniya mutaxassislari ishtirokida davlat va nodavlat nashriyot-matbaa ijodiy uylari xodimlari uchun seminar-trening tashkil etildi. Bu haqda agentlik matbuot xizmati ma’lum qildi.
O‘zbekistonlik mutaxassislarni o‘qitish masalasi joriy yil 3-oktabr kuni O‘zMAA bosh direktori Laziz Tangriyev bilan bo‘lib o‘tgan uchrashuvda kelishib olingan edi. Mazkur uchrashuvda Laziz Tangriyev o‘zbekistonlik matbaachilar Muller Martini’ni yaxshi bilishini, chunki aynan ushbu kompaniya tomonidan o‘rnatilgan zamonaviy texnik uskunalardan bir necha nashriyot-matbaa ijodiy uylarida foydalanilayotganligini, kelgusida O‘zbekiston tomoni nashr qilish va matbaachilikni rivojlantirishda hamkorlikni yanada mustahamlashdan manfaatdor ekanligini ta’kidlab o‘tgan edi.
Muller Martini savdo menejeri G.Samoylov seminar qatnashchilariga kompaniya faoliyati, yo‘nalishlari hamda so‘nggi yutuqlari haqida batafsil ma’lumot berib, texnik uskunalarning ishlash uslubi, ulardan foydalanish qoidalari bilan yaqindan tanishtirdi.
— O‘zbekistonda faoliyat yurituvchi nashriyot-matbaa korxonalari bilan hamkorlikning yo‘lga qo‘yilishi va yanada mustahkamlanishi bizning kompaniya uchun juda muhim, — deydi G.Samoylov.— Chunki O‘zbekiston asosiy sheriklarimizdan biri hisoblanadi. Biz zamonaviy texnik uskunalarni nafaqat o‘rnatamiz, balki mahalliy mutaxassislarni qisqa kurslarda o‘qitish bilan ham shug‘ullanamiz, shuningdek, nashriyot ishida foydalaniladigan mashinalar uchun ehtiyot qismlarni yetkazib berishda ham hamkorlikka tayyormiz.
Ma’lumot uchun, Muller Martini chop etishdan keyingi jarayonlar (bloklab tikish, muqovalash, varaqlarni taxlash, uch tomonlama kesish, ip bilan tikish va hokazo) uchun matbaa uskunalarini ishlab chiqarish va servis xizmat ko‘rsatish bo‘yicha dunyodagi eng yirik kompaniyalardan biri. Kompaniya 1946-yilda Shveysariyaning Sofingen shahrida tashkil etilgan.
Izoh (0)