Viloyatda madaniy meros obyekti sifatida ro‘yxatga kiritilgan, ammo hozirgi kunda yo‘q bo‘lib ketgan 22 ta obida aniqlandi. Bu haqda “Milliy tiklanish” partiyasi Namangan viloyati kengashiga tayanib Turon 24 xabar berdi.
Partiya viloyatdagi ro‘yxatga olingan 282 ta madaniy meros obyektining bugungi holatini o‘rganib, yakuniy ro‘yxatni shakllantirgan. “Madaniy meros obyektlarining 158 tasida kadastr hujjatlari aniqlanmadi, 147 tasida muhofaza belgisi yo‘q. Ularning 73 tasi qoniqarsiz, 15 tasi esa avariya holatida”, – deydi viloyat kengashi matbuot kotibi Dilnoza Azizova.
Shuningdek, viloyatda madaniy meros obyektlari hududida ularga zarar yetkazgan holda qurilish ishlari olib borilgan 7 ta holat aniqlandi. Ro‘yxatga olingan 22 ta obyekt esa yo‘q bo‘lib ketganligi ma’lum bo‘ldi. Ular qatorida Namangan shahridagi A.Shomirzayev uyi, Namangan tumanidagi Karimboy masjidi, Norin tumanidagi Marguzartepa, Pop tumanidagi paleolit davri platosi, Uchqo‘rg‘on tumanidagi Nomsiztepa, Chust tumanidagi Mulla Xudoyberganboy masjidini keltirib o‘tish mumkin.
Viloyatda jami 26 ta moddiy-madaniy meros obyekti xususiyatiga ega, biroq ro‘yxatga kiritilmagan obidalar aniqlangan. Kosonsoy tumanidan Chorsahoba masjidi, Sayyid Jaloliddin maqbarasi, Namangan tumanidagi Kuyukmozor, Pop tumanidagi Ko‘kto‘nliota ziyoratgohi, Uychi tumanidagi Qorashayxbuva mozori, Chortoq tumanidagi Sulton Sayyid Jaloliddin maqbarasi, Yangiqo‘rg‘on tumanidagi Amirota ziyoratgohi shular jumlasidan.
Tekshiruv davomida ular to‘la o‘rganib chiqildi va ro‘yxatga kiritish bo‘yicha tavsiyalar ishlab chiqildi.
Izoh (0)