Ўзбекистон Матбуот ва ахборот агентлигида Швейцариянинг Muller Martini савдо менежери Г.Самойлов ҳамда ушбу компания мутахассислари иштирокида давлат ва нодавлат нашриёт-матбаа ижодий уйлари ходимлари учун семинар-тренинг ташкил этилди. Бу ҳақда агентлик матбуот хизмати маълум қилди.
Ўзбекистонлик мутахассисларни ўқитиш масаласи жорий йил 3 октябрь куни ЎзМАА бош директори Лазиз Тангриев билан бўлиб ўтган учрашувда келишиб олинган эди. Мазкур учрашувда Лазиз Тангриев ўзбекистонлик матбаачилар Muller Martini’ни яхши билишини, чунки айнан ушбу компания томонидан ўрнатилган замонавий техник ускуналардан бир неча нашриёт-матбаа ижодий уйларида фойдаланилаётганлигини, келгусида Ўзбекистон томони нашр қилиш ва матбаачиликни ривожлантиришда ҳамкорликни янада мустаҳамлашдан манфаатдор эканлигини таъкидлаб ўтган эди.
Muller Martini савдо менежери Г.Самойлов семинар қатнашчиларига компания фаолияти, йўналишлари ҳамда сўнгги ютуқлари ҳақида батафсил маълумот бериб, техник ускуналарнинг ишлаш услуби, улардан фойдаланиш қоидалари билан яқиндан таништирди.
— Ўзбекистонда фаолият юритувчи нашриёт-матбаа корхоналари билан ҳамкорликнинг йўлга қўйилиши ва янада мустаҳкамланиши бизнинг компания учун жуда муҳим, — дейди Г.Самойлов.— Чунки Ўзбекистон асосий шерикларимиздан бири ҳисобланади. Биз замонавий техник ускуналарни нафақат ўрнатамиз, балки маҳаллий мутахассисларни қисқа курсларда ўқитиш билан ҳам шуғулланамиз, шунингдек, нашриёт ишида фойдаланиладиган машиналар учун эҳтиёт қисмларни етказиб беришда ҳам ҳамкорликка тайёрмиз.
Маълумот учун, Muller Martini чоп этишдан кейинги жараёнлар (блоклаб тикиш, муқовалаш, варақларни тахлаш, уч томонлама кесиш, ип билан тикиш ва ҳоказо) учун матбаа ускуналарини ишлаб чиқариш ва сервис хизмат кўрсатиш бўйича дунёдаги энг йирик компаниялардан бири. Компания 1946 йилда Швейцариянинг Софинген шаҳрида ташкил этилган.
Изоҳ (0)