“Barselona” futbolchisi Lionel Messi va uning otasi “Lionel Messi” xayriya fondi orqali pul yuvishda gumon qilinmoqda. Bu haqda “Kommersant” xabar bermoqda.
Futbolchiga nisbatan ayblov argentinalik prokuror Pablo Turano tomonidan ilgari surilgan. Ayblov fondning sobiq xodimlaridan biri sudda ko‘rsatma berilganidan so‘ng e’lon qilingan. Sobiq xodimning so‘zlariga ko‘ra, fond qabul qilgan xayriya pullari 2010-yildan boshlab ofshor zonalardagi hisob-raqamlarga o‘tkazilgan.
Hozirda prokuror fond faoliyatini tekshirishni so‘ramoqda. Sud ushbu holat yuzasidan surishtirouv olib borish uchun yetarli asos bor-yo‘qligini hal qilishi kerak. Futbolchi va uning otasi barcha ayblovlarni rad etmoqda. Ularning so‘zlariga ko‘ra, “shikoyat hech qanday asosga ega emas”.
Eslatib o‘tamiz, 2013-yili Ispaniya soliq organlari Lionel Messi v uning otasini soliq qonunchiligini buzishda gumon qilgan edi. Keyinroq prokuratura futbolchiga ayblov e’lon qilmaslikka qaror qildi, chunki u xayriya fondi tashkil etgan o‘rtoqlik uchrashuvlari orqali pul yuvganini tasdiqlovchi dalillarni topa olmadi.
2017-yili Messi va uning otasi umumiy hisobda 4,1 million yevro soliqni to‘lashdan bo‘yin tovlashda ayblanib, sud tomonidan ularga 21 oyga ozodlikdan mahrum etish jazosi tayinlangan edi. Ularning har ikkisi 2007—2009-yillarda reklama shartnomalaridan tushgan daromadni yashirish uchun soxta firmalar xizmatidan foydalanganlikda ayblangan edi.
O‘shanda futbolchi otasi tomonidan tashkil etilgan firmalardan bexabar bo‘lganini ma’lum qilgan edi. Messi 250 ming yevro miqdorida jarima to‘lab, qamoq jazosidan qutulib qolgan.
Izoh (0)