«Барселона» футболчиси Лионель Месси ва унинг отаси «Лионель Месси» хайрия фонди орқали пул ювишда гумон қилинмоқда. Бу ҳақда «Коммерсантъ» хабар бермоқда.
Футболчига нисбатан айблов аргентиналик прокурор Пабло Турано томонидан илгари сурилган. Айблов фонднинг собиқ ходимларидан бири судда кўрсатма берилганидан сўнг эълон қилинган. Собиқ ходимнинг сўзларига кўра, фонд қабул қилган хайрия пуллари 2010 йилдан бошлаб офшор зоналардаги ҳисоб-рақамларга ўтказилган.
Ҳозирда прокурор фонд фаолиятини текширишни сўрамоқда. Суд ушбу ҳолат юзасидан суриштироув олиб бориш учун етарли асос бор-йўқлигини ҳал қилиши керак. Футболчи ва унинг отаси барча айбловларни рад этмоқда. Уларнинг сўзларига кўра, «шикоят ҳеч қандай асосга эга эмас».
Эслатиб ўтамиз, 2013 йили Испания солиқ органлари Лионель Месси в унинг отасини солиқ қонунчилигини бузишда гумон қилган эди. Кейинроқ прокуратура футболчига айблов эълон қилмасликка қарор қилди, чунки у хайрия фонди ташкил этган ўртоқлик учрашувлари орқали пул ювганини тасдиқловчи далилларни топа олмади.
2017 йили Месси ва унинг отаси умумий ҳисобда 4,1 миллион евро солиқни тўлашдан бўйин товлашда айбланиб, суд томонидан уларга 21 ойга озодликдан маҳрум этиш жазоси тайинланган эди. Уларнинг ҳар иккиси 2007—2009 йилларда реклама шартномаларидан тушган даромадни яшириш учун сохта фирмалар хизматидан фойдаланганликда айбланган эди.
Ўшанда футболчи отаси томонидан ташкил этилган фирмалардан бехабар бўлганини маълум қилган эди. Месси 250 минг евро миқдорида жарима тўлаб, қамоқ жазосидан қутулиб қолган.
Изоҳ (0)