Rossiya Liberal-demokratik partiyasi rahbari Vladimir Jirinovskiy 1-noyabr kuni Tojikistonga safari chog‘ida sobiq Ittifoq respublikalari Rossiyaga ixtiyoriy qo‘shilishi tarafdori ekanligini bildirdi. Bu haqda “Turon 24” ma’lum qildi.
Jirinovskiy 2010-yilda “Rossiya tarkibida O‘rta Osiyo federal okrugi”ni tuzishni taklif qilgan edi. Ushbu fikriga Dushanbeda izoh berar ekan, “Yevropa Ittifoqiga o‘xshash birlashuv tarafdoriman. Bugungi kunda faqat 300 milliondan ortiq nufuzga ega davlatlargina yashab qola olishiga ishonaman”, — degan Jirinovskiy.
OAV Vladimir Jirinovskiy 2—3-noyabrda O‘zbekistonga ham tashrif buyuradi deb xabar tarqatgan. Xabarlarda aytilishicha, Jirinovskiy boshchiligidagi LDPR vakillari Toshkent va Buxoroni ziyorat qiladi. Bu uning O‘zbekistonga ilk kelishi bo‘ladi.
Vladimir Jirinovskiy Rossiya va Markaziy Osiyoda millatchilik, xususan, O‘zbekiston va o‘zbeklar haqidagi epataj chiqishlari bilan mashhur siyosatchi hisoblanadi. Jirinovskiy Ruminiya, Bolgariya, Germaniya va Qozog‘istonni haqoratlovchi bayonotlaridan keyin ushbu davlatlarda “istalmagan shaxs” deb e’lon qilingan va ularga kirishi taqiqlangan.
Izoh (0)