Shaxsiy uylarda isitish pechlari va isitish tizimlarini tekshirish va nazorat qilish bo‘yicha hukumat komissiyasi tuzildi. Bu haqda, o‘z manbasiga asoslanib, “Kun.uz” xabar bermoqda.
Mazkur komissiyaga O‘zbekiston bosh vaziri birinchi o‘rinbosari Ochilboy Ramatov boshchilik qiladi. Qayd etilishicha, mos ravishda viloyat va tumanlarda ham namunaviy ko‘rinishda komissiyalar tuziladi.
Hukumat komissiyasi 31-oktabr kuni Toshkent shahrining Chilonzor tumani Dilxush ko‘chasidagi xonadonda istiqomat qilgan bir oilaning to‘rt farzandi is gazidan zaharlanib vafot etishi ortidan tuzilgan.
Ma’lumot uchun, 18-sentabr kuni Kogon tumanida gaz to‘ldirish shoxobchasidan chiqqan gaz ballonli avtobus 700 metrcha yurganidan so‘ng, gaz ballonlaridan biri portlab ketgan, oqibatda besh kishi halok bo‘lgan va 21 kishi jarohatlangan edi.
Shundan so‘ng O‘zbekistondagi barcha avtomobillarga gaz to‘ldirish shoxobchalari, gaz ballonli avtomobillar va markaziy qozonxonalarni tekshirish bo‘yicha hukumat komissiyasi tuzilgan edi. Bu komissiyaga ham Ochilboy Ramatov rahbar etib tayinlangan.
Izoh (0)