Шахсий уйларда иситиш печлари ва иситиш тизимларини текшириш ва назорат қилиш бўйича ҳукумат комиссияси тузилди. Бу ҳақда, ўз манбасига асосланиб, «Kun.uz» хабар бермоқда.
Мазкур комиссияга Ўзбекистон бош вазири биринчи ўринбосари Очилбой Раматов бошчилик қилади. Қайд этилишича, мос равишда вилоят ва туманларда ҳам намунавий кўринишда комиссиялар тузилади.
Ҳукумат комиссияси 31 октябрь куни Тошкент шаҳрининг Чилонзор тумани Дилхуш кўчасидаги хонадонда истиқомат қилган бир оиланинг тўрт фарзанди ис газидан заҳарланиб вафот этиши ортидан тузилган.
Маълумот учун, 18 сентябрь куни Когон туманида газ тўлдириш шохобчасидан чиққан газ баллонли автобус 700 метрча юрганидан сўнг, газ баллонларидан бири портлаб кетган, оқибатда беш киши ҳалок бўлган ва 21 киши жароҳатланган эди.
Шундан сўнг Ўзбекистондаги барча автомобилларга газ тўлдириш шохобчалари, газ баллонли автомобиллар ва марказий қозонхоналарни текшириш бўйича ҳукумат комиссияси тузилган эди. Бу комиссияга ҳам Очилбой Раматов раҳбар этиб тайинланган.
Изоҳ (0)