Rossiya Liberal-demokratik partiyasi raisi Vladimir Jirinovskiy boshchiligidagi delegatsiya 2-noyabr kuni Buxoroga keldi. Bu haqda O‘zA xabar bermoqda.
Rossiya parlamenti quyi palatasi deputatlaridan iborat delegatsiyani Buxoro xalqaro aeroportida O‘zbekiston Senati Raisi birinchi o‘rinbosari Sodiq Safoyev, Buxoro viloyati hokimi O‘ktam Barnoyev va keng jamoatchilik vakillari kutib olgan.
Kunning ikkinchi yarmida Rossiya delegatsiyasi a’zolari Buxoroning diqqatga sazovor joylarini ziyorat qiladi. Xususan, Ark qal’asida bo‘lib, bu yerda joylashgan Buxoro davlat badiiy me’morchilik muzey-qo‘riqxonasi va uning tasarrufidagi “Sitorai Mohi Xosa” xalq amaliy bezak san’ati muzeyi, shuningdek, boshqa ko‘plab tarixiy obidalar, hunarmandchilik markazlari faoliyati bilan tanishadi.
Jirinovskiy Buxoroga kelishidan avval Tojikiston poytaxti Dushanbeda bo‘lgan. “Turon 24”ning yozishicha, Jirinovskiy u yerda sobiq Ittifoq respublikalari Rossiya tarkibiga ixtiyoriy qo‘shilishi tarafdori ekanligini bildirgan. Qayd etishlaricha, Jirinovskiy 2010-yili Rossiya tarkibida O‘rta Osiyo federal okrugini tuzishni taklif qilgan edi. Ushbu chaqirig‘iga Dushanbeda izoh berar ekan, Jirinovskiy: “Men Yevropa Ittifoqiga o‘xshash birlashuv tarafdoriman. Men bugungi kunda faqat 300 milliondan ortiq nufuzga ega davlatlargina yashab qola olishiga ishonaman”, — deb aytgan.
Ta’kidlash o‘rinliki, Vladimir Jirinovskiy Rossiya va Markaziy Osiyoda millatchilik, xususan, O‘zbekiston va o‘zbeklar haqidagi epataj chiqishlari bilan mashhur siyosatchi hisoblanadi. Jirinovskiy Ruminiya, Bolgariya, Germaniya va Qozog‘istonni haqoratlovchi bayonotlaridan keyin ushbu davlatlarda “istalmagan shaxs” (persona non grata) deb e’lon qilingan va ushbu mamlakatlarga kirishiga taqiq qo‘yilgan.
Izoh (0)