O‘zbekiston Tashqi ishlar vaziri Abdulaziz Komilov 2018-yilning 2-noyabr kuni Yevropa parlamentining Markaziy Osiyo davlatlari va Mo‘g‘uliston bilan aloqalar bo‘yicha delegatsiyasi raisi Iveta Grigule-Peterse boshchiligidagi O‘zbekistonga tashrif buyurgan deputatlar guruhini qabul qildi. Bu haqda TIV axborot xizmati xabar berdi.
Suhbat chog‘ida 1-noyabr kuni Toshkent shahrida bo‘lib o‘tgan “O‘zbekiston — Yevropa Ittifoqi” parlament hamkorlik qo‘mitasining navbatdagi majlisi yakunlariga ijobiy baho berildi. Takidlanganidek, ushbu tadbir ochiq, konstruktiv va ishonchli muloqot ruhida o‘tdi va Oliy Majlis hamda Yevroparlament deputatlariga hamkorlikning istiqbollarini muhokama qilish imkonini yaratdi.
Qayd etilganidek, O‘zbekiston va Yevropa Ittifoqi qonunchilari o‘rtasidagi muntazam va samarali aloqalar, amaliy tajriba almashinuvlari ikki tomonlama munosabatlarning muhim qismi hisoblanadi.
Uchrashuvda qo‘shma kun tartibidagi boshqa masalalar ham ko‘rib chiqildi.
Muzokaralarda Yevropa Ittifoqi delegatsiyasi rahbari, elchi Eduards Stiprays ishtirok etdi.
Izoh (0)