O‘z mulkidan ajralib, “Daryo” tahririyatiga murojaat qilgan Samarqad shahrida faoliyat yurituvchi “Yangiobod farm med servis” MChJ rahbari Jamshid Shomurodov haqiqat izlab 8 marotaba shahar prokuraturasi, 20 marotaba viloyat prokuraturasi, 8 bor Bosh prokuratura, 10 marotaba Xalq qabulxonasi, 3 bora viloyat hokimi Erkinjon Turdimovga murojaat qildi. Tadbirkorning ta’kidlashicha, uning masalasini tegishli idoralar tomonida paysalga solinmoqda, deydi “Daryo” muxbiri Farhod Norbo‘tayev.
Jamshid Shomurodovning bildirishicha, Samarqand shahar, Gagarin ko‘chasi, 128-uy manzilida joylashgan besh qavatli binoning uch qavatini egallagan va foydalanishmaydoni 1300,0 kvadrat metr bo‘lgan tibbiy markaz hamda 17 ta kvartira unig xususiy mulki hisoblanadi. Biroq, uni ogohlantirmasdan “Garant quruvchi servis” MChJ tomonidan bino buzib tashlanib, mulkiga katta zarar yetkazilgan. Shahar hokimining 2015-yil 27-noyabr va 2016-yil 19-dekabrdagi sonli qarorlari asosida buziladigan bino o‘rnida qo‘p qavatli turar joy qurish uchun yuqorida nomi keltirilgan MChJga berilgan.
— Shu yerda ko‘p qavatli turar joy qurilishi rejalashtirilgan ekan, shahar hokimligi birinchi navbatda menga qurishni taklif qilishi lozim edi. Men qurolmagan taqdirimda, tender asosida yutgan qurilish tashkiloti meni rozi qilgandan so‘ng xususiy mulkimni buzishi kerak edi. Ammo bu borada shahar hokimligi menga hech qanday ogohlantirish bermasdan mulkimni boshqa shaxsga berib yubordi, — deydi Jamshid Shomurodov.
Jamshid Shomurodovning arizasi asosida Samarqand shahar IIB tomonidan 2017-yilning 15 iyul kuni Jinoyat kodeksining 228-moddasi 1-qismi bilan jinoyat ishi qo‘zg‘atilgan. Biroq, bir yarim yildan beri tergov ishlari cho‘zilib kelmoqda. Tadbirkorning turli tashkilotlarga qiligan o‘nlab murojaatlar hamon natijasiz qolib ketmoqda.
Samarqand shahar hokimi o‘rinbosari B.Elmurodovning 2018-yil 18-fevralda shahar prokuraturasiga yuborgan xatida J. Shomurodovning talabi qonuniy ekanligini tasdiqlagan.
“Garant quruvchi servis” korxonasi tomonidan O‘zbekiston Respublikasining amaldagi qonun talablari hamda belgilangan talablarga rioya qilmasdan, ushbu manzildagi turar va noturar uy-joylar mulkdor J. Shomurodovning roziligi olinmasdan qonunga xilof ravishda, ya’ni noqonuniy tarzda buzib tashlangan. Mazkur holat yuzasidan fuqaro J. Shomurodovga Samarqand shahar prokuraturasi yoki fuqarolik ishlari bo‘yicha shahar sudiga murojaat etilishi, sud hamda prokuratura organlari tomonidan qonunga belgilangan tartibda mazkur qarorni bekor qilishda shahar hokimligi e’tirozi yo‘qligini ma’lum qilamiz”, deyiladi xatda.
Ko‘rinib turibdiki, prokuratura shahar hokimining 2015-yil 27-noyabr va 2016-yil 19-dekabrda chiqargan qarorlariga protest keltirib, bekor qilsa, adolatni tiklasa bo‘ladi. Ammo bu ish hanuzgacha paysalga solib kelinayotganligini tushunish qiyin.
Jamshid Shomurodovning masalasi yuzasidan Samarqand shahar prokuraturasiga murojaat qildik. Shahar prokurori va uning o‘rinbosari yo‘qligi sababli savollarimizga shahar prokuraturasi tergovchisi Rustam Daminov qisqagina javob berdi.
—Biz hammasini qonun doirasida ko‘rib chiqamiz, — deydi Rustam Daminov.
Afsuski, tergovchi ham J.Shomurodovning shahar prokuraturasiga 8 bor qilgan arizasi nima sababdan o‘rganilmayotganligining aniq sabablarini tushuntirib bera olmadi.
Yana bir holat. Jinoyat ishlari bo‘yicha Samarqand viloyat sudining 2018-yil 27-fevraldagi hukmiga ko‘ra Samarqand shahar IIB tergov bo‘limi tergovchisi X.Namozovning 2017-yil 11-noyabrdagi jinoyat ishining “Garant quruvchi servis” MChJ xodimlariga oid qismini harakatdan tugatish haqidagi qarori bekor qilingan. Shuningdek, hukmda Gagarin ko‘chasi, 128-uyda joylashgan xonadonlarni noqonuniy buzilishi va ulardagi jihozlarga zarar yetkazilib, talon-toroj qilinganligi holati bo‘yicha “Garant quruvchi servis” MChJ rahbari E.Mo‘minov va xodimlarining harakatlarida Jinoyat Kodeksining 169, 173-moddalarida nazarda tutilgan jinoyatlar alomatlari mavjudligini aniqlash va huquqiy baho berishlik uchun material tariqasida ajratilib, Samaqand viloyat prokurori orqali tegishli surishtiruv organiga yuborilishi ko‘rsatib o‘tilgan. Ammo orada shuncha vaqt o‘tgan bo‘lishiga qaramasdan bu borada ham hech qanday ish amalga oshirilgani yo‘q.
— Ikki marta viloyat hokimi Erkinjon Turdimov qabulida bo‘ldim. Birinchi marta 2018-yilning 3 avgustida E.Turdimov viloyat prokurori o‘rinbosari O.Hoshimov, shahar hokimi o‘rinbosari B.Elmurodov va viloyat bosh arxitektori N.Sodiqovga kerakli topshiriq berib, masalani hal qilishga uch kun muddat berdi. Ammo bir oydan keyin ham vaziyat o‘zgarmaganligi uchun ikkinchi marta 10-sentabr kuni yana viloyat rahbari qabuliga kirishga majbur bo‘ldim. Bu safar Ichki ishlar, Adliya, Davlat soliq boshqarmalari hamda “Mahalla” jamg‘armasi rahbarlariga uch kun ichida “masalaning yechimi yuzasidan viloyat hokimiga taklif kiritish” va viloyat prokuraturasiga “yuqoridagi topshiriqlarni amalga oshirilishida qonun hujjatlariga rioya etilishi yuzasidan nazorat qilish” tavsiya etilgan edi. Ammo shu vaqtgacha hech narsa o‘zgarmadi, — deydi J. Shomurodov.
Ha, aytgancha, “J.Shomurodov va F.Shomurodovalarning moddiy zararini qoplash uchun” mazmunidagi 2017-yil 29—30-sentyabrdagi to‘lov topshiriqlari bilan jami 462 million so‘m pullarni Samarqand viloyat Ichki ishlar boshqarmasining depozit raqamiga to‘langanligi ularga tegishli turar joylarning noqonuniy ravishda buzilganligini tasdiqlovchi yana bir muhim omil hisoblanadi. Ammo Jamshid Shomurodov bu pul 17 ta kvartira va tibbiy markaz binosi uchun arzimasligini aytib, adolat izlamoqda.
— Viloyat hokimi Erkinjon Turdimov bilan ikki bor uchrashuvdan keyin viloyat hokimining tadbirkorlar bilan bo‘lib o‘tayotgan uchrashuvlari shunchaki xo‘jako‘rsinga, faqat reklama uchun o‘tkazilyapti degan xulosaga keldim. Viloyat hokimi tadbirkorlarning muammosini eshitib, uni hal etish yuzasidan qo‘l ostidagi xodimlariga topshiriq beradi. Ular bo‘lsa hokimning talabini bajarmaydi. Bunaqangi ko‘zbo‘yamachilik qabilidagi uchrashuvlarning kimga keragi bor? —deydi Jamshid Shomurodov.
J.Shomurodovning mulkiga yetkazilgan zarar natijasida “Yangiobod farm med servis” MChJda faoliyat yurituvchi 10 nafardan ortiq fuqaro ishsiz qoldi. Tadbirkorning o‘zi esa o‘z mulkini qaytarib olsa turizmni rivojlantirish maqsadida ushbu joyda zamonaviy mehmonxona qurish niyati borligini bildirib o‘tdi.
— Agarda xususiy mulkim bo‘lgan va buzib tashlangan binolar o‘zimga qaytarilsa, bu yerda zamonaviy mehmonxona qurmoqchiman. Bu orqali ham turizmni rivojlantirish, ham qo‘shimcha tarzda 70-80 nafar fuqaroni ish bilan ta’minlamoqchiman, — deydi Jamshid Shomurodov.
“Daryo” J.Shomurodov bilan yuzaga kelgan holatni kuzatib boradi va bu borada mutasaddi tashkilotlarning javobini kutib qoladi.
Izoh (0)