Samarqandda “Orol dengizi basseynida turg‘un boshqaruv va ijtimoiy barqarorlikni ilgari surish uchun innovatsion yondoshuvlar” mavzusidagi xalqaro forumning ilk kuni boshlandi. Bu haqda “Daryo”ga Innovatsion rivojlanish vazirligi matbuot xizmati ma’lum qildi.
Innovatsion rivojlanish vaziri Ibrohim Abdurahmonov Prezident huzuridagi xalqaro Orolbo‘yi innovatsiya markazi hamda Orolbo‘yida innovatsiyalarni qo‘llab-quvvatlash jamg‘armasi tashkil etilganini ma’lum qildi. Shuningdek, vazirlik va Qurg‘oqchilik sharoitida biodehqonchilik xalqaro markazi (ICBA) direktori Ismaxon Eluafi o‘rtasida hamkorlik memorandumi imzolandi.
Markaz Nukus shahrida joylashib, qurg‘oqchilik sharoitida tadqiqotlar, texnologiyalar transferi va ta’lim sohasidagi ilg‘or innovatsiyalar markaziga aylanadi. Uning oldiga Orol dengizining qurigan tubida ekotizim va barqaror tirik hayotni rivojlantirish, jumladan, agroo‘rmon melioratsiyasi, sahroni daraxtzorga aylantirish, suv osti ekinlari, bioenergetika, ekinlar diversifikatsiyasi, ekinlar kompleksini yetishtirish, chorvachilik, yaylovlarni rivojlantirish, qurg‘oqchilikni boshqarish va uning oqibatlarini yumshatish kabi vazifalar qo‘yilgan.
ICBA markazning texnik-iqtisodiy asoslashni qo‘llab-quvvatlash jarayonini boshqaradi.
Orolbo‘yida innovatsiyalarni qo‘llab-quvvatlash jamg‘armasi Innovatsion rivojlanish va novatorlik g‘oyalarini qo‘llab-quvvatlash jamg‘armasi, Qurg‘oqchilik sharoitida biodehqonchilik xalqaro markazi (ICBA), vazirlik tomonidan o‘tkaziladigan grant tanlovlari natijalariga ko‘ra ajratiladigan mablag‘lar, Jahon banki, Osiyo taraqqiyot banki va Islom taraqqiyot banki tomonidan loyihalarni moliyalashtirishga ajratiladigan mablag‘lar, xalqaro moliya institutlari va boshqa xorijiy donorlarning grantlari, yuridik va jismoniy shaxslar, shuningdek O‘zbekiston rezidentlari bo‘lmagan shaxslarning xayriya mablag‘lari hisobidan shakllantirilishi kutilmoqda.
Izoh (0)