Самарқандда «Орол денгизи бассейнида турғун бошқарув ва ижтимоий барқарорликни илгари суриш учун инновацион ёндошувлар» мавзусидаги халқаро форумнинг илк куни бошланди. Бу ҳақда «Дарё»га Инновацион ривожланиш вазирлиги матбуот хизмати маълум қилди.
Инновацион ривожланиш вазири Иброҳим Абдураҳмонов Президент ҳузуридаги халқаро Оролбўйи инновация маркази ҳамда Оролбўйида инновацияларни қўллаб-қувватлаш жамғармаси ташкил этилганини маълум қилди. Шунингдек, вазирлик ва Қурғоқчилик шароитида биодеҳқончилик халқаро маркази (ИCБА) директори Исмахон Элуафи ўртасида ҳамкорлик меморандуми имзоланди.
Марказ Нукус шаҳрида жойлашиб, қурғоқчилик шароитида тадқиқотлар, технологиялар трансфери ва таълим соҳасидаги илғор инновациялар марказига айланади. Унинг олдига Орол денгизининг қуриган тубида экотизим ва барқарор тирик ҳаётни ривожлантириш, жумладан, агроўрмон мелиорацияси, саҳрони дарахтзорга айлантириш, сув ости экинлари, биоэнергетика, экинлар диверсификацияси, экинлар комплексини етиштириш, чорвачилик, яйловларни ривожлантириш, қурғоқчиликни бошқариш ва унинг оқибатларини юмшатиш каби вазифалар қўйилган.
ИCБА марказнинг техник-иқтисодий асослашни қўллаб-қувватлаш жараёнини бошқаради.
Оролбўйида инновацияларни қўллаб-қувватлаш жамғармаси Инновацион ривожланиш ва новаторлик ғояларини қўллаб-қувватлаш жамғармаси, Қурғоқчилик шароитида биодеҳқончилик халқаро маркази (ИCБА), вазирлик томонидан ўтказиладиган грант танловлари натижаларига кўра ажратиладиган маблағлар, Жаҳон банки, Осиё тараққиёт банки ва Ислом тараққиёт банки томонидан лойиҳаларни молиялаштиришга ажратиладиган маблағлар, халқаро молия институтлари ва бошқа хорижий донорларнинг грантлари, юридик ва жисмоний шахслар, шунингдек Ўзбекистон резидентлари бўлмаган шахсларнинг хайрия маблағлари ҳисобидан шакллантирилиши кутилмоқда.
Изоҳ (0)