Samarqand viloyati Toyloq tuman hokimligi nashri “Qo‘shchinor” gazetasida tuman hokimi Bahodir Bobononazarovning aholiga murojaati e’lon qilindi. Hokim o‘z murojaatida oriyatsiz erkaklarni tanqid qildi.
“Bugun xotin-qizlarning xorijda ishlashi degan balo boshimizga soya solyaptiki, uning ortidan qancha-qancha muammolar, dilxiraliklar kelib chiqmoqda. Ba’zi oriyatsiz erkaklar ayollarini chetga ishlashga jo‘natib, o‘zlari uy ‘sohibasi’ bo‘lib o‘tirishibdi.
Tog‘ni ursa talqon qilgulik kuchga ega notavonlar xotini yuboradigan pulga ko‘z tikib o‘tirishibdi. Ayting, ularning oilasi oldidagi burchi, or-nomusi, g‘ururi qayerda qoldi?! Nahotki, bunday tubanlik bizga yarashsa?! Chet elda yashab, ishlab yurgan opa-singillarimiz, u yerdagi yengil-yelpi hayotga uchib, oilasidan, bolalaridan voz kechib ketish holatlarini qanday izohlaymiz? Xonadonning farishtasi bo‘lishga munosib onalarimizning beshikdagi emizikli go‘dagini tashlab, boylik izlab yurishi fojia emasmi? Buning natijasida oilaviy ajrimlar soni ortib, xonadonlar bekasiz, farzandlar qarovsiz qolmoqda”, — deyiladi hokimning murojaatida.
Hokim keltirgan statistik ma’lumotlarga ko‘ra, joriy yilning 9 oyi davomida tumanda er-xotin o‘rtasidagi ajrimlar soni 181 taga yetgan. Shuningdek, hozirgi kunda 4650 nafar xotin-qizlar ishlash maqsadida ketgan bo‘lib, shundan 1851 nafari Turkiya davlatida, 1307 nafari Rossiya federatsiyasida, 230 nafari Isroilda, 195 nafari Koreya mamlakatida, qolgani esa boshqa xorijiy mamlakatlarda ishlamoqda.
“Yo‘qchilik, ocharchilik davrida ham yetimlarni bag‘riga olib, boshini silagan, boriga shukr, yo‘g‘iga sabr qilgan xalq zurriyotlari endilikda o‘z bolasidan yuz o‘girib, norasidalarini tirik yetim qilib tashlab ketmoqda.
Turli sabablarga ko‘ra parokanda bo‘lgan oila farzandlarining kelajagini kim o‘ylaydi? Pushti kamaridan bo‘lgan zurriyotlariga to‘g‘ri tarbiya berish u yoqda tursin, hatto ularning moddiy ta’minotini o‘ylamay, rizqini qirqayotgan, aliment to‘lashdan bosh tortayotgan kimsalarni qanday ota deb atash mumkin?
Kelinglar, xulosa chiqaraylik! Bizni erkak deb bilib, yelkamizga bosh qo‘ygan ayolimizni, ishongan tog‘i deb bilgan farzandlarimizni asraylik! Erkak degan nomga loyiq bo‘laylik! Alloh tomonidan berilgan umr deb atalmish ulug‘ ne’matni bekorchi narsalarga, fisqu fasodlarga, kimningdir dilini og‘ritib, hayotdan bezdirishga emas, balki, ezgu amallar, buyuk ishlarga sarflab, farzandlarimiz istiqboli uchun mehnat qilaylik!”, — deyiladi hokimning murojaatnomasida.
Bahodir Bobononazarov o‘z murojaatnomasida dabdabali to‘ylarni qisqartirish lozimligini ham ta’kidlab o‘tdi:
“Yana bir og‘riqli muammo borki, bundan aslo ko‘z yumib bo‘lmaydi. Bu to‘y-ma’rakalarimizdagi ortiqcha dabdababozlikdir. Oilaviy nizolar, ajrimlar, qarindosh-urug‘, quda-andalarning yuz ko‘rmas bo‘lishiga olib kelayotgan bu illatning tomir otishiga ma’raka va marosimlarda yangicha urf-odatlarni joriy etish, ortiqcha sarpo-suruqlar qilish, ayniqsa, bo‘lajak kelinlarimiz kuyovning uyiga qimmatbaho mebelu, jihozlar bilan borishi sabab bo‘lmayaptimi?! Bu holat er-yigitlarimizning izzat-nafsiga tegmayaptimi? Ota-onasiga ‘Mana bunaqa mebelni olib berasiz’ deb, narxi osmondagisini ko‘rsatayotgan qizlarimizning hayosi qayerda qoldi?! Nahotki, ular o‘sha biz bilgan Bibixonim, Nodirabegim, Uvaysiy, To‘maris avlodi bo‘lsa?! Qachon bu haqda o‘ylab ko‘ramiz?! Qachongacha misqollab yiqqan mablag‘imizni bir kunlik hoyu havas uchun shamolga sovuramiz? Kibr-u havo, manmanlik kasalligidan qachon xalos bo‘lamiz?!”
Izoh (0)