Самарқанд вилояти Тойлоқ туман ҳокимлиги нашри «Қўшчинор» газетасида туман ҳокими Баҳодир Бобононазаровнинг аҳолига мурожаати эълон қилинди. Ҳоким ўз мурожаатида ориятсиз эркакларни танқид қилди.
«Бугун хотин-қизларнинг хорижда ишлаши деган бало бошимизга соя соляптики, унинг ортидан қанча-қанча муаммолар, дилхираликлар келиб чиқмоқда. Баъзи ориятсиз эркаклар аёлларини четга ишлашга жўнатиб, ўзлари уй ‘соҳибаси’ бўлиб ўтиришибди.
Тоғни урса талқон қилгулик кучга эга нотавонлар хотини юборадиган пулга кўз тикиб ўтиришибди. Айтинг, уларнинг оиласи олдидаги бурчи, ор-номуси, ғурури қаерда қолди?! Наҳотки, бундай тубанлик бизга ярашса?! Чет элда яшаб, ишлаб юрган опа-сингилларимиз, у ердаги енгил-елпи ҳаётга учиб, оиласидан, болаларидан воз кечиб кетиш ҳолатларини қандай изоҳлаймиз? Хонадоннинг фариштаси бўлишга муносиб оналаримизнинг бешикдаги эмизикли гўдагини ташлаб, бойлик излаб юриши фожиа эмасми? Бунинг натижасида оилавий ажримлар сони ортиб, хонадонлар бекасиз, фарзандлар қаровсиз қолмоқда», — дейилади ҳокимнинг мурожаатида.
Ҳоким келтирган статистик маълумотларга кўра, жорий йилнинг 9 ойи давомида туманда эр-хотин ўртасидаги ажримлар сони 181 тага етган. Шунингдек, ҳозирги кунда 4650 нафар хотин-қизлар ишлаш мақсадида кетган бўлиб, шундан 1851 нафари Туркия давлатида, 1307 нафари Россия федерациясида, 230 нафари Исроилда, 195 нафари Корея мамлакатида, қолгани эса бошқа хорижий мамлакатларда ишламоқда.
«Йўқчилик, очарчилик даврида ҳам етимларни бағрига олиб, бошини силаган, борига шукр, йўғига сабр қилган халқ зурриётлари эндиликда ўз боласидан юз ўгириб, норасидаларини тирик етим қилиб ташлаб кетмоқда.
Турли сабабларга кўра пароканда бўлган оила фарзандларининг келажагини ким ўйлайди? Пушти камаридан бўлган зурриётларига тўғри тарбия бериш у ёқда турсин, ҳатто уларнинг моддий таъминотини ўйламай, ризқини қирқаётган, алимент тўлашдан бош тортаётган кимсаларни қандай ота деб аташ мумкин?
Келинглар, хулоса чиқарайлик! Бизни эркак деб билиб, елкамизга бош қўйган аёлимизни, ишонган тоғи деб билган фарзандларимизни асрайлик! Эркак деган номга лойиқ бўлайлик! Аллоҳ томонидан берилган умр деб аталмиш улуғ неъматни бекорчи нарсаларга, фисқу фасодларга, кимнингдир дилини оғритиб, ҳаётдан бездиришга эмас, балки, эзгу амаллар, буюк ишларга сарфлаб, фарзандларимиз истиқболи учун меҳнат қилайлик!», — дейилади ҳокимнинг мурожаатномасида.
Баҳодир Бобононазаров ўз мурожаатномасида дабдабали тўйларни қисқартириш лозимлигини ҳам таъкидлаб ўтди:
«Яна бир оғриқли муаммо борки, бундан асло кўз юмиб бўлмайди. Бу тўй-маъракаларимиздаги ортиқча дабдабабозликдир. Оилавий низолар, ажримлар, қариндош-уруғ, қуда-андаларнинг юз кўрмас бўлишига олиб келаётган бу иллатнинг томир отишига маърака ва маросимларда янгича урф-одатларни жорий этиш, ортиқча сарпо-суруқлар қилиш, айниқса, бўлажак келинларимиз куёвнинг уйига қимматбаҳо мебелу, жиҳозлар билан бориши сабаб бўлмаяптими?! Бу ҳолат эр-йигитларимизнинг иззат-нафсига тегмаяптими? Ота-онасига ‘Мана бунақа мебелни олиб берасиз’ деб, нархи осмондагисини кўрсатаётган қизларимизнинг ҳаёси қаерда қолди?! Наҳотки, улар ўша биз билган Бибихоним, Нодирабегим, Увайсий, Тўмарис авлоди бўлса?! Қачон бу ҳақда ўйлаб кўрамиз?! Қачонгача мисқоллаб йиққан маблағимизни бир кунлик ҳою ҳавас учун шамолга совурамиз? Кибр-у ҳаво, манманлик касаллигидан қачон халос бўламиз?!»
Изоҳ (0)