O‘zbekiston Prezidenti Shavkat Mirziyoyevning 2018-yil 22-avgustdagi Farmoniga muvofiq, Amerika — O‘zbekiston savdo palatasi raisi Kerolin Lemm “Do‘stlik” ordeni bilan mukofotlangan edi.
“Xalq so‘zi Online”ning yozishicha, yaqinda Vashington shahrida mazkur yuksak mukofotni Lemm xonimga tantanali topshirish marosimi o‘tkazildi.
Shu munosabat bilan tashkil etilgan tadbirda Amerika jamoatchiligi vakillari, ekspertlar, O‘zbekistonning AQShdagi elchixonasi xodimlari qatnashdi.
Ta’kidlanganidek, ikki tomonlama munosabatlar bugun o‘zaro ishonch va mustahkam do‘stlik tamoyillari asosida rivojlanib bormoqda. Shu yil may oyida O‘zbekiston Prezidentining AQShga amalga oshirgan tarixiy tashrifi ikki davlat hamkorligida yangi sahifa ochdi.
Tadbirda Amerika — O‘zbekiston savdo palatasi raisiga “Do‘stlik” ordeni topshirildi.
Prezident Shavkat Mirziyoyevga meni mana shunday yuksak mukofotga loyiq ko‘rib, yuksak darajada e’tirof etgani uchun cheksiz minnatdorlik bildiraman.Bugun O‘zbekistonda biznes va tadbirkorlikni rag‘batlantirish, korrupsiyaga qarshi kurashish, aholini har tomonlama qo‘llab-quvvatlash borasida ko‘plab sa’y-harakatlar olib borilyapti. Ayni shu jihatlar mamlakatga chet el investitsiyasini jalb etishda muhim o‘rin tutadi. Biz, Amerika — O‘zbekiston savdo palatasi vakillari AQSh kompaniyalarini shu yil 23-oktabrda Toshkentda o‘tkaziladigan AQSh — O‘zbekiston yillik biznes forumida ishtirok etishga taklif etamiz. Maqsadimiz — AQSh tadbirkorlari bilan hamkorlikda muvaffaqiyatga erishish uchun o‘z bilim, tajriba va resurslarimizni O‘zbekiston hukumati bilan baham ko‘rish.
Kerolin Lemm, Amerika — O‘zbekiston savdo palatasi raisi
Izoh (0)