Ўзбекистон Президенти Шавкат Мирзиёевнинг 2018 йил 22 августдаги Фармонига мувофиқ, Америка — Ўзбекистон савдо палатаси раиси Кэролин Лэмм «Дўстлик» ордени билан мукофотланган эди.
«Халқ сўзи Online»нинг ёзишича, яқинда Вашингтон шаҳрида мазкур юксак мукофотни Лэмм хонимга тантанали топшириш маросими ўтказилди.
Шу муносабат билан ташкил этилган тадбирда Америка жамоатчилиги вакиллари, экспертлар, Ўзбекистоннинг АҚШдаги элчихонаси ходимлари қатнашди.
Таъкидланганидек, икки томонлама муносабатлар бугун ўзаро ишонч ва мустаҳкам дўстлик тамойиллари асосида ривожланиб бормоқда. Шу йил май ойида Ўзбекистон Президентининг АҚШга амалга оширган тарихий ташрифи икки давлат ҳамкорлигида янги саҳифа очди.
Тадбирда Америка — Ўзбекистон савдо палатаси раисига «Дўстлик» ордени топширилди.
Президент Шавкат Мирзиёевга мени мана шундай юксак мукофотга лойиқ кўриб, юксак даражада эътироф этгани учун чексиз миннатдорлик билдираман.Бугун Ўзбекистонда бизнес ва тадбиркорликни рағбатлантириш, коррупцияга қарши курашиш, аҳолини ҳар томонлама қўллаб-қувватлаш борасида кўплаб саъй-ҳаракатлар олиб бориляпти. Айни шу жиҳатлар мамлакатга чет эл инвестициясини жалб этишда муҳим ўрин тутади. Биз, Америка — Ўзбекистон савдо палатаси вакиллари АҚШ компанияларини шу йил 23 октябрда Тошкентда ўтказиладиган АҚШ — Ўзбекистон йиллик бизнес форумида иштирок этишга таклиф этамиз. Мақсадимиз — АҚШ тадбиркорлари билан ҳамкорликда муваффақиятга эришиш учун ўз билим, тажриба ва ресурсларимизни Ўзбекистон ҳукумати билан баҳам кўриш.
Кэролин Лэмм, Америка — Ўзбекистон савдо палатаси раиси
Изоҳ (0)