O‘zbekiston Adliya vazirligi amaldagi qurilish me’yorlari va qoidalari (QMQ)ni, shuningdek, qurilish sohasini tartibga soluvchi normativ hujjatlarni tahlil qilib chiqdi, deb yozadi “Gazeta.uz”.
O‘rganish chog‘ida qurilish sohasini rivojlanishdan to‘xtatib turuvchi hamda zamonaviy standartlar, innovatsion g‘oyalar va texnologiyalarning tezkorlik bilan joriy etilishiga to‘sqinlik qiluvchi tizimli muammolar va kamchiliklar aniqlandi. Bu ularning tanqidiy qayta ko‘rib chiqilishi, soddalashtirilishi va xalqaro standartlarga muvofiqlashtirilishiga zarurat borligini ko‘rsatadi.
Sanab o‘tilishicha, QMQning yagona reyestri va hisobi yo‘q, shuningdek, QMQ o‘z vaqtida yangilanib bormaydi, ba’zi me’yorlar va qoidalar o‘z dolzarbligini yo‘qotgan. Bundan tashqari, xalqaro qurilish standartlari asosida milliy standartlarni ishlab chiqishga qodir yosh va malakali mutaxassislar yetishmovchiligi kuzatiladi.
Ba’zi QMQ va qonunchilik me’yorlari qurilish sohasi rivojlanishiga salbiy ta’sir o‘tkazmoqda. Shuningdek, qonunchilikda texnik va mualliflik nazoratlari bilan shug‘ullanuvchi shaxslarga nisbatan talablar yo‘q, ularning o‘qitilishi, malakasining oshirilishi va sertifikatlanishi ko‘zda tutilmagan.
Adliya vazirligi tomonidan o‘rganib chiqish yakunlari bo‘yicha ishlab chiqilgan takliflar ko‘rib chiqish uchun O‘zbekiston Prezidenti Administratsiyasiga kiritildi.
Izoh (0)