Ўзбекистон Адлия вазирлиги қурилиш соҳасидаги муаммоларни кўрсатиб ўтди

Ўзбекистон Адлия вазирлиги амалдаги қурилиш меъёрлари ва қоидалари (ҚМҚ)ни, шунингдек, қурилиш соҳасини тартибга солувчи норматив ҳужжатларни таҳлил қилиб чиқди, деб ёзади «Газета.uz».

Ўрганиш чоғида қурилиш соҳасини ривожланишдан тўхтатиб турувчи ҳамда замонавий стандартлар, инновацион ғоялар ва технологияларнинг тезкорлик билан жорий этилишига тўсқинлик қилувчи тизимли муаммолар ва камчиликлар аниқланди. Бу уларнинг танқидий қайта кўриб чиқилиши, соддалаштирилиши ва халқаро стандартларга мувофиқлаштирилишига зарурат борлигини кўрсатади.

Санаб ўтилишича, ҚМҚнинг ягона реестри ва ҳисоби йўқ, шунингдек, ҚМҚ ўз вақтида янгиланиб бормайди, баъзи меъёрлар ва қоидалар ўз долзарблигини йўқотган. Бундан ташқари, халқаро қурилиш стандартлари асосида миллий стандартларни ишлаб чиқишга қодир ёш ва малакали мутахассислар етишмовчилиги кузатилади.

Баъзи ҚМҚ ва қонунчилик меъёрлари қурилиш соҳаси ривожланишига салбий таъсир ўтказмоқда. Шунингдек, қонунчиликда техник ва муаллифлик назоратлари билан шуғулланувчи шахсларга нисбатан талаблар йўқ, уларнинг ўқитилиши, малакасининг оширилиши ва сертификатланиши кўзда тутилмаган.

Адлия вазирлиги томонидан ўрганиб чиқиш якунлари бўйича ишлаб чиқилган таклифлар кўриб чиқиш учун Ўзбекистон Президенти Администрациясига киритилди.