Janubiy Koreya O‘zbekistonga majburiy tibbiy sug‘urta tizimiga o‘tishda ko‘maklashadi. Bu haqda bosh vazir o‘rinbosari Aziz Abduhakimov ma’lum qildi, deya xabar beradi Sputnik.
Abduhakimov O‘zbekiston bu tizimga o‘tishi kerakligi, ammo bu ish oson bo‘lmasligi, eng avvalo odamlarning ishonchini qozonish zarurligini ta’kidladi.
“Odamlarimiz hali bunga o‘rganmagan. Lekin tushunishlari lozim: bu sekin-sekin to‘lab boriladigan va bir kun, agarda kasal bo‘lganida, davolanishni to‘liq qoplaydigan pullardir”, deya izoh beradi Abduhakimov.
Bosh vazir o‘rinbosari O‘zbekiston nega hozir birdan majburiy sug‘urta tizimiga o‘ta olmasligiga izoh berar ekan, buning sabablarini iqtisodiy omilga borib taqaydi. Abduhakimovga ko‘ra, buni aholining aksariyat qismi rasman band bo‘lganidagina muvaffaqiyatli amalga oshirish mumkin.
“Hozir buni amalga oshiradigan bo‘lsak, budjet ko‘tara olmaydigan tizimga o‘tib qolishimiz mumkin”, izoh beradi bosh vazir o‘rinbosari.
“Onkologiya yoki shu kabi boshqa bir og‘ir dardga chalinganida uyini, mashinasini sotayotganlarni ko‘rib turibmiz. Bunday bo‘lishi kerak emas. Sug‘urta shu uchun zarurki, inson og‘ir dardga chalinganida tushkunlik yoki umidsizlikka tushmasligi zarur”, deydi Abduhakimov.
Bosh vazir o‘rinbosarining aytishicha, majburiy sug‘urta tizimiga birinchi navbatda budjet tashkilotlari va yirik korxonalar o‘tkaziladi, so‘ngra butun aholi qatlami qamrab olinadi.
Ma’lumot uchun, oldinroq O‘zbekistonda majburiy sug‘urta tizimi 10 yil oralig‘ida joriy etilishi mumkinligi xabar qilingandi.
Izoh (0)