Жанубий Корея Ўзбекистонга мажбурий тиббий суғурта тизимига ўтишда кўмаклашади. Бу ҳақда бош вазир ўринбосари Азиз Абдуҳакимов маълум қилди, дея хабар беради Sputnik.
Абдуҳакимов Ўзбекистон бу тизимга ўтиши кераклиги, аммо бу иш осон бўлмаслиги, энг аввало одамларнинг ишончини қозониш зарурлигини таъкидлади.
«Одамларимиз ҳали бунга ўрганмаган. Лекин тушунишлари лозим: бу секин-секин тўлаб бориладиган ва бир кун, агарда касал бўлганида, даволанишни тўлиқ қоплайдиган пуллардир», дея изоҳ беради Абдуҳакимов.
Бош вазир ўринбосари Ўзбекистон нега ҳозир бирдан мажбурий суғурта тизимига ўта олмаслигига изоҳ берар экан, бунинг сабабларини иқтисодий омилга бориб тақайди. Абдуҳакимовга кўра, буни аҳолининг аксарият қисми расман банд бўлганидагина муваффақиятли амалга ошириш мумкин.
«Ҳозир буни амалга оширадиган бўлсак, бюджет кўтара олмайдиган тизимга ўтиб қолишимиз мумкин», изоҳ беради бош вазир ўринбосари.
«Онкология ёки шу каби бошқа бир оғир дардга чалинганида уйини, машинасини сотаётганларни кўриб турибмиз. Бундай бўлиши керак эмас. Суғурта шу учун зарурки, инсон оғир дардга чалинганида тушкунлик ёки умидсизликка тушмаслиги зарур», дейди Абдуҳакимов.
Бош вазир ўринбосарининг айтишича, мажбурий суғурта тизимига биринчи навбатда бюджет ташкилотлари ва йирик корхоналар ўтказилади, сўнгра бутун аҳоли қатлами қамраб олинади.
Маълумот учун, олдинроқ Ўзбекистонда мажбурий суғурта тизими 10 йил оралиғида жорий этилиши мумкинлиги хабар қилинганди.
Изоҳ (0)