Alkogol iste’molidan dunyoda har yili uch millionga yaqin kishi vafot etadi. Bu OITS, zo‘ravonlik va yo‘l-transport hodisalari sababli yuzaga keladigan o‘limlar sonidan ko‘proqdir. Bu haqda MedicalXpress Jahon sog‘liqni saqlash tashkiloti ma’lumotlariga tayanib xabar berdi.
Spirtli ichimliklar har 20 ta o‘limning bittasiga sababchi bo‘ladi, bunda alkogol mastlik holatida mashina boshqarish, mastlikka bog‘liq bo‘lgan zo‘ravonlik hamda yurak-tomir tizimi faoliyatining buzilishi, jigar sirrozi va saratonning bir nechta turlari kabi ko‘plab kasalliklar hisobga olinadi. Bundan tashqari, alkogol tuberkulyoz (sil), OITV va pnevmoniya kabi infeksiyalar bilan kasallanish xavfini oshiradi.
Alkogol bilan bog‘liq barcha o‘limlarning to‘rtdan uch qismi erkaklar hissasiga to‘g‘ri keladi. Bundan tashqari, 20—29 yoshdagi kishilar orasida o‘limlarning katta ulushi (13,5 foizi) ham spirtli ichimliklar suiiste’moliga to‘g‘ri keladi.
Jahon sog‘liqni saqlash tashkiloti ma’lumotlariga ko‘ra, 237 million erkak va 46 million ayol alkogolga tobelikdan azob chekadi. O‘rtacha hisobda 2,3 milliard kishi kuniga 33 gramm toza spirt qabul qiladi. Bu taxminan ikki bokal vino yoki bir shisha (katta) pivoga teng.
Izoh (0)