Алкоголь истеъмолидан дунёда ҳар йили уч миллионга яқин киши вафот этади. Бу ОИТС, зўравонлик ва йўл-транспорт ҳодисалари сабабли юзага келадиган ўлимлар сонидан кўпроқдир. Бу ҳақда MedicalXpress Жаҳон соғлиқни сақлаш ташкилоти маълумотларига таяниб хабар берди.
Спиртли ичимликлар ҳар 20 та ўлимнинг биттасига сабабчи бўлади, бунда алкоголь мастлик ҳолатида машина бошқариш, мастликка боғлиқ бўлган зўравонлик ҳамда юрак-томир тизими фаолиятининг бузилиши, жигар сиррози ва саратоннинг бир нечта турлари каби кўплаб касалликлар ҳисобга олинади. Бундан ташқари, алкоголь туберкулёз (сил), ОИТВ ва пневмония каби инфекциялар билан касалланиш хавфини оширади.
Алкоголь билан боғлиқ барча ўлимларнинг тўртдан уч қисми эркаклар ҳиссасига тўғри келади. Бундан ташқари, 20—29 ёшдаги кишилар орасида ўлимларнинг катта улуши (13,5 фоизи) ҳам спиртли ичимликлар суиистеъмолига тўғри келади.
Жаҳон соғлиқни сақлаш ташкилоти маълумотларига кўра, 237 миллион эркак ва 46 миллион аёл алкоголга тобеликдан азоб чекади. Ўртача ҳисобда 2,3 миллиард киши кунига 33 грамм тоза спирт қабул қилади. Бу тахминан икки бокал вино ёки бир шиша (катта) пивога тенг.
Изоҳ (0)