O‘zbekiston Respublikasi Prezidenti Shavkat Mirziyoyevning tashabbusi bilan Qirg‘iziston Respublikasining O‘sh viloyati markazida qurib bitkazilgan Alisher Navoiy nomidagi 18-maktab gimnaziyasi 2018—2019-o‘quv yilidan o‘z faoliyatini boshladi. Bu haqda “Muslimaat.uz” o‘z Telegram-kanali orqali xabar berdi.
Maktab oxirgi zamonaviy uslubda bino etilgan bo‘lib, unda o‘qish uchun 1100 nafar o‘quvchi qabul qilingan. Jami 1-sinfdan to 11-sinfgacha 34 ta sinf mavjud. Darslar qirg‘iz, rus, ingliz va o‘zbek tillarida olib boriladi.
Maktab direktori Karamurzayeva Turdioyim Absamatovna bo‘lib, uning izoh berishicha, ushbu maktab qurilishidan maqsad – ikki davlat o‘rtasidagi, qirg‘iz va o‘zbek millatlari orasidagi o‘zaro do‘stlik aloqalarini mustahkamlashdan iborat.
Mazkur maktab O‘sh davlat universitetining shundoqqina yonida joylashgan va uch qavatdan iborat. Unda har bir fanga bag‘ishlangan alohida xonalar mavjud hamda zarur jihozlar bilan ta’minlangan.
O‘tgan yili oktabr oyida boshlangan qurilish ishlari may oyida nihoyasiga yetgan. Xabar berishlaricha, maktab qurilishiga 25 milliard so‘m sarf etilgan.
Izoh (0)