Shveysariya O‘zbekiston eksportining asosiy bozori bo‘lib qolmoqda. U yerga oltin sotiladi

Shveysariya O‘zbekiston eksportining asosiy bozori bo‘lib qolmoqda, deb yozadi Spot Markaziy bank hisobotiga tayanib.

Birinchi yarim yillik yakunlariga ko‘ra, unga mamlakat jami eksportining 31 foizi to‘g‘ri keldi. Taqqoslash uchun, Xitoyga 18 foizi, Rossiyaga 16 foizi to‘g‘ri kelgan.

Pul ko‘rinishida mamlakat Shveysariyaga 1,5 milliard dollarlik mahsulot sotgan. Misol tariqasida, bu barcha Osiyo mamlakatlariga eksport hajmidan ko‘proq (1,3 milliard dollar) va barcha MDH davlatlariga qilingan eksportdan sal kamroq (1,6 milliard dollar) demakdir.

O‘zbekiston eksportining asosiy qismi (ham Shveysariyaga, ham umuman olganda) qimmatbaho metallar, xususan, oltin bo‘lib qolmoqda. Ular hissasiga butun eksport hajmining 30 foizi to‘g‘ri keldi.

“O‘rtacha narxda hisoblangan oltin savdosi hajmi I chorakda 30 tonna, II chorakda esa 6,6 tonnani tashkil qildi”, — deyiladi hisobotda.

I chorakda oltinning jahon narxi 1 troya unsiyasi uchun o‘rtacha 1330,7 dollarga, II chorakda esa 1307,2 dollarga teng bo‘ldi.

Demak, birinchi uch oyda O‘zbekiston 1,2 milliard dollarlik, ikkinchi uch oyda esa 310 million dollarlik qimmatbaho metallarni eksport qilgan.