Toshkent viloyati Qibray tumanida “O‘ztransgaz” aksiyadorlik jamiyati tomonidan “Sohada innovatsion texnologiyalarni qo‘llash – rivojlanishning muhim omili“ mavzusida brifing o‘tkazildi, deb xabar beradi O‘zA.
Sir emas, aholini sifatli tabiiy va suyultirilgan gaz bilan ta’minlash, ayniqsa, kuz-qish mavsumida uzluksiz yetkazib berish, shuningdek, gazdan yashirincha foydalanish, iste’mol qilingan tabiiy gaz haqini o‘z vaqtida to‘lash kabi masalalarda muammolar mavjud. Mamlakatda davlatning xalq bilan bevosita muloqot ko‘prigi tashkil etilgani, xususan, murojaatlar bilan ishlashda yangi tizim yo‘lga qo‘yilgani ham aholining gaz iste’moli bilan bog‘liq muammolari ko‘pligini ko‘rsatdi. Shu bilan birga, tizimda foydalanib kelinayotgan eski texnologiyalar ortiqcha gaz isrofi va sarf-xarajatni keltirib chiqarmoqda. Bir so‘z bilan aytganda, mavjud texnologiyalar ma’nan eskirgan.
– Tabiiyki, tizimdagi mazkur holat sohaga istiqbolli innovatsion texnologiyalarni tatbiq etishni taqozo qilmoqda, – deydi “O‘ztransgaz” AJ boshqarma boshlig‘i Akmal Eshonqulov. – Shu maqsadda yurtimiz mutaxassislari dunyoning ko‘plab davlatlari tajribasi va yetakchi firmalari texnologiyalarini o‘rgandi. Shu asosda istiqbolli, deb topilgan 7 loyiha amalga oshirilmoqda.
Brifingda mutaxassislar tomonidan jurnalistlarga ushbu loyihalarning amalga oshirilish jarayoni va ahamiyati to‘g‘risida batafsil ma’lumot berildi.
Ma’lumotlarga ko‘ra, gaz transporti tizimida dispetcherlik boshqaruv va ma’lumotlar yig‘imining avtomatlashtirilishi bo‘yicha amalga oshirilayotgan SCADA dasturi mazkur tizimda ma’lumotlarni real vaqtda qabul qilish, qayta ishlash, texnologik protsesslarni mantiqiy boshqarish, magistral quvurlardagi avariya holatlari bo‘yicha o‘z vaqtida xabardor bo‘lish imkonini beradi. Yana bir muhim innovatsion loyiha bu – kompressor stansiyalaridagi gaz haydash agregatlari dvigatellaridan ajralib chiqayotgan issiqlik energiyasidan elektr energiyasi ishlab chiqarish loyihasidir. Mazkur loyiha bo‘yicha Italiyaning “TURBODEN“ kompaniyasi bilan hamkorlikda Andijon viloyatidagi “Xo‘jaobod“ yer osti gaz saqlash omborida amaliy ishlar boshlangan. Bunda gaz trubinali kompressor stansiyasida tabiiy gaz yoqilishidan hosil bo‘ladigan issiqlik energiyasidan soatiga 1 MVt, yiliga 3 million kVt soat elektr energiyasi ishlab chiqariladi.
Tadbir doirasida tumanning Usmon Yusupov nomli mahallasiga press-tur tashkil etildi. OAV vakillari mahallada gaz taqsimoti tizimini avtomatlashtirish loyihasi bo‘yicha amalga oshirilgan ishlar bilan tanishdi.
Qayd etilishicha, gaz taqsimoti tizimining avtomatlashtirilishi xonadonlardagi tabiiy gaz bosimi bilan bog‘liq muammolarga to‘liq barham beradi. Xususan, endilikda aholiga yetkazib berilayotgan tabiiy gaz bosimi 10 barobar oshiriladi. Mazkur tizimning avtomatlashtirilishi shuningdek, mahallaga berilayotgan tabiiy gaz bosimi, harorati to‘g‘risida markazlashgan dispetcherlik xizmatiga onlayn ma’lumot uzatish imkonini yaratib, ortiqcha gaz isrofi, o‘g‘rilik, o‘z vaqtida to‘lov, ayniqsa, gaz bilan bog‘liq turli baxtsiz hodisalarning oldini olishga zamin yaratadi.
Tadbir doirasida tizimga oid ilg‘or innovatsion texnologiyalar ko‘rgazmasi ham tashkil etildi.
Izoh (0)