Andijon viloyati hokimi Sh.Abdurahmonov Asaka tumanida tadbirkorlar va xorijiy investorlar bilan muloqot o‘tkazdi, deb yozadi O‘zA.
Uchrashuvda viloyatda 2018—2019-yillarda amalga oshirilishi belgilangan, lekin banklar tomonidan moliyalashtirilishi kechiktirilayotgan 31 ta investitsiya loyihasi muhokama qilindi. Loyihalarni o‘z vaqtida amalga oshirishga to‘siq bo‘layotgan, xususan, kredit ajratish bilan bog‘liq muammolarni bartaraf etish bo‘yicha choralar belgilandi.
Yer maydonlari va bo‘sh turgan bino-inshootlarni belgilangan tartibda ajratish, kreditlar berilishi, ichimlik suvi, elektr energiyasi, tabiiy gaz ta’minoti bilan bog‘liq qator muammolar ko‘tarildi. Ularning ayrimlari joyida hal etildi. Bundan tashqari, 14 tadbirkorning yer so‘rab qilgan murojaati qanoatlantirilib, shu yerning o‘zida yer ajratish bo‘yicha tegishli hujjatlar rasmiylashtirildi.
Shuningdek, viloyat hokimi meva-sabzavotni qayta ishlash, to‘qimachilik mahsulotlari va elektrokar ishlab chiqarishga qaratilgan loyihalarni amalga oshirish yuzasidan Rossiya, Janubiy Koreya va turkiyalik investorlar bilan ham muloqot o‘tkazdi.
– O‘zbekistonda tadbirkorlar, ayniqsa, investorlarga keng imkoniyatlar yaratilgani uchun ham yurtingizda ish olib borishga qaror qildik, – deydi Rooper teikom Co. Ltd kompaniyasi direktori Sung In Song. – Hamkorlarimiz bilan umumiy qiymati 2 million AQSh dollari bo‘lgan loyiha doirasida kelgusi yil oxiriga qadar Asakada elektrokar ishlab chiqarishni yo‘lga qo‘yishga kelishib oldik.
Muloqot davomida yangi loyihalarni amalga oshirishga to‘siq bo‘layotgan muammolarning aksariyati hal etildi, ayrim masalalar bo‘yicha mutasaddilarga tegishli topshiriqlar berildi.
Izoh (0)