Швейцария Ўзбекистон экспортининг асосий бозори бўлиб қолмоқда. У ерга олтин сотилади

Швейцария Ўзбекистон экспортининг асосий бозори бўлиб қолмоқда, деб ёзади Spot Марказий банк ҳисоботига таяниб.

Биринчи ярим йиллик якунларига кўра, унга мамлакат жами экспортининг 31 фоизи тўғри келди. Таққослаш учун, Хитойга 18 фоизи, Россияга 16 фоизи тўғри келган.

Пул кўринишида мамлакат Швейцарияга 1,5 миллиард долларлик маҳсулот сотган. Мисол тариқасида, бу барча Осиё мамлакатларига экспорт ҳажмидан кўпроқ (1,3 миллиард доллар) ва барча МДҲ давлатларига қилинган экспортдан сал камроқ (1,6 миллиард доллар) демакдир.

Ўзбекистон экспортининг асосий қисми (ҳам Швейцарияга, ҳам умуман олганда) қимматбаҳо металлар, хусусан, олтин бўлиб қолмоқда. Улар ҳиссасига бутун экспорт ҳажмининг 30 фоизи тўғри келди.

«Ўртача нархда ҳисобланган олтин савдоси ҳажми I чоракда 30 тонна, II чоракда эса 6,6 тоннани ташкил қилди», — дейилади ҳисоботда.

I чоракда олтиннинг жаҳон нархи 1 троя унсияси учун ўртача 1330,7 долларга, II чоракда эса 1307,2 долларга тенг бўлди.

Демак, биринчи уч ойда Ўзбекистон 1,2 миллиард долларлик, иккинчи уч ойда эса 310 миллион долларлик қимматбаҳо металларни экспорт қилган.