O‘zbekiston Bosh prokuraturasi 18-sentabr kuni ertalab Buxoro viloyati Kogon tumani hududidan o‘tuvchi “G‘uzor—Buxoro—Nukus” A-380 avtotrassasining 201-kilometrida Isuzu avtobusida gaz ballonining portlashi yuzasidan tafsilotlarni oshkor etdi, deb yozadi “Gazeta.uz”.
Joriy yilning 18-sentabr kuni soat 7:30 larda fuqaro V.Qobilov boshqaruvidagi “Vobkent Gulshani” MChJga tegishli bo‘lgan, Isuzu rusumli, 80 Y 120 KA davlat belgili avtobus Kogon tumanidagi Zelich oil metan gaz quyish shoxobchasidan yoqilg‘i quyib, taxminan 700 metr masofa yurgandan so‘ng, mazkur A380 avtomobil yo‘li “Kogon-Qorovulbozor” yo‘nalishining 201-km.da harakatlanib ketayotganida, avtoulov gaz balloni portlagan.
Natijada, avtobusda yo‘lovchi sifatida ketayotgan 26 nafar fuqaro jarohatlanib, ularning 4 nafari hodisa joyida va 1 nafari shifoxonadavafot etgan, qolgan 21 nafar yo‘lovchining 5 nafari og‘ir, 7 nafari o‘rta og‘ir hamda 9 nafari yengil ahvolda, 5 nafar og‘ir bemor Respublika shoshilinch tez tibbiy yordam ilmiy markazi Buxoro filialiga, qolganlari esa Kogon shahar shoshilinch tez tibbiy yordam markaziga yotqizilib, ularga shifokorlar tomonidan malakali tibbiy yordam ko‘rsatilmoqda.
Mazkur holat yuzasidan 2018-yil 18-sentyabrda viloyat IIB TB tomonidan O‘zbekiston Respublikasi JKning 259-moddasi (Yong‘in xavfsizligi qoidalarini buzish) 2-qismi “a”, “b” bandlari bilan jinoyat ishi qo‘zg‘atilib, dastlabki tergov harakatlari viloyat IIB TB zimmasiga yuklatilib, viloyat prokuraturasi tomonidan nazoratga olindi.
Dastlabki tergov davomida sudga oid tibbiyot, avtotexnika va yong‘in texnika ekspertizalari tayinlandi.
Shuningdek, Zelich oil metan gaz quyish shoxobchasida avtomobillarga yoqilg‘i quyish normalariga rioya qilinishi ahvolini o‘rganish borasida, mutaxassislar jalb qilinib, o‘rganishlar olib borilmoqda.
Aniqlanishicha, Qorovulbozor tumanidagi “Raxmon Axmad” fermer xo‘jaligi raisi R.Ahmedov Vobkent tumani “Pushmon” MFY, “Hayrabodcha” qishlog‘ida yashovchi G.Roziqova tomonidan 25 nafar fuqarodan iborat qishloq xo‘jaligi ishlariga jalb qilish uchun tashkil qilingan mavsumiy madad guruhi bilan fermer xo‘jaligida ekilgan makkajo‘xori so‘tasini olish uchun Vobkent tumanidan Qorovulbozor tumaniga olib ketayotgan vaqtda ushbu hodisa sodir bo‘lgan.
Jabrlanganlarning oilalariga ijtimoiy ko‘mak berish bo‘yicha barcha choralar ko‘rilmoqda. Halok bo‘lganlarning oilalariga 10 million so‘m, og‘ir jarohatlar olganlarga — 5 million so‘m, qolgan jabrlanuvchilarga — 2 million so‘mdan ajratildi.
Izoh (0)