Farg‘ona viloyatida maktabgacha ta’lim tizimini yanada takomillashtirish, moddiy-texnika bazasini mustahkamlash, maktabgacha ta’lim muassasalari davlat va nodavlat tarmog‘ini kengaytirish, ularni malakali pedagog kadrlar bilan ta’minlash borasida muayyan ishlar amalga oshirilmoqda. Ammo bugungi kunda qishloq hududlarida mazkur yo‘nalishda muammolar talaygina. Bu haqda O‘zA xabar bermoqda.
Rishton tumani maktabgacha ta’lim bo‘limi mudiri Munojatxon Husanovaning aytishicha, tumanda bugungi kunda 49 ta maktabgacha ta’lim muassasasi faoliyat ko‘rsatib kelmoqda. Ularga 6 mingdan ortiq bola qamrab olingan. Tuman bo‘yicha bolalarni maktabgacha ta’lim muassasalariga qamrab olish 38 foizni tashkil etmoqda. Joriy yilda davlat-xususiy sheriklik shartlari asosida 12 ta loyiha amalga oshirilishi ko‘zda tutilgan bo‘lsa-da, bu hali hamon paysalga solinmoqda.
Tumanning ba’zi maktabgacha ta’lim maskanlari bugungi kun talabiga umuman javob bermaydi. Achinarlisi, hududning o‘zida hal bo‘ladigan muammolarga ham mutasaddilar panja ortidan qaramoqda.
“Qoshqayron” mahalla fuqarolar yig‘inidagi 28-maktabgacha ta’lim muassasasida bo‘lgan kishi ana shunday noxush manzaraga duch keladi. Qishloq ahli ko‘p joyga bu yerdagi muammolar borasida murojaat bilan chiqdi, amalda esa hech narsa bo‘lmayapti. Ayni kunlarda bu yerda 5 ta guruhda 100 nafar bola tarbiyalanmoqda.
1991-yilda bunyod etilgan mazkur zamonaviy maskanning bugun faqatgina bitta binosi faoliyat ko‘rsatmoqda. Bir gektardan ortiq hududning atrofi devor bilan o‘ralmagan. Obodonlashtirish ishlarini gapirmasa ham bo‘ladi. Hududni begona o‘tlar bosib yotibdi. Oqava suv bilan ham ta’minlanmagan.
– Bir qator vazirliklardan kelib, muammolarimizni ko‘rib, “hal qilib beramiz“, deb va’dalar berib ketishgan, – deydi mazkur maktabgacha ta’lim muassasasi rahbari Matluba Mahkamova. – Ammo vaqt o‘tmoqdaki, amaliy natija yo‘q. Orqadagi bo‘sh turgan bino masalasi ham o‘z yechimini topmayapti. Mahallamizda bu binoni olib, davlat-xususiy sherikchilik asosida bog‘cha qilaman, degan tadbirkorlar bor.
Mahallada bolasini bog‘chaga berish niyatida bo‘lgan ota-onalar juda ko‘p. Afsuski, bu yerda sharoitlarning yetarli emasligi oqibatida bolalar qamrab olinmayapti.
Izoh (0)