Buxoroda ovchi qirg‘ovul otaman deb o‘z qarindoshini o‘ldirib qo‘ydi

Buxoro viloyatining Qorako‘l tumanida 10-sentabr kuni ov vaqtida inson o‘limi bilan bog‘liq baxtsiz hodisa yuz berdi. Bu haqda O‘zA xabar bermoqda.

Tumandagi “Oq oltin” mahallasida yashovchi 41 yoshli K.O‘. va uning qarindoshi 51 yoshli K.M. hamda tumandagi “Xo‘jakon” mahallasida istiqomat qiluvchi 39 yoshli I.Ya. ov qilish maqsadida cho‘l etagiga tutash fermer xo‘jaliklaridan birining ekin maydoniga borgan.

Ular shu yerda uchib yurgan ikkita qirg‘ovulni ko‘rgan. K.O‘. darhol o‘zining ov miltig‘ini qirg‘ovul tomonga to‘g‘rilab, miltiq tepkisini bosgan, biroq kutilmaganda sochma o‘q oldinroqda turgan uning qarindoshi K.M.ga tekkan.

“Sheriklar vaqtni boy bermaslik maqsadida yaralangan hamrohni mashinada tuman tibbiyot birlashmasiga olib ketishadi. Afsuski, shifoxonaga yetganda kech bo‘ladi — K.M. yo‘lda vafot etgani ma’lum bo‘ladi”, — deyiladi O‘zA axborotida.

Xabar berishlaricha, mazkur holat yuzasidan fuqaro K.O‘.ga nisbatan Jinoyat Kodeksining tegishli moddasi bilan jinoyat ishi qo‘zg‘atilib, tergov harakatlari olib borilmoqda.