15-sentabr kuni O‘zbekiston davlat jismoniy tarbiya va sport universitetning yangi o‘quv binosini foydalanishga topshirish marosimi bo‘lib o‘tdi. Bu haqda O‘zA xabar bermoqda.
O‘zbekiston Prezidentining 2018-yil 5-martdagi “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari to‘g‘risida”gi farmoniga muvofiq, O‘zbekiston davlat jismoniy tarbiya va sport institutiga “universitet” maqomi berilgan edi.
Bugungi kunda universitetda beshta fakultet mavjud bo‘lib, bakalavr bosqichida 3 335 nafar, magistratura bosqichida 50 nafar talaba tahsil olmoqda. Shuningdek, 18 ta kafedra, 9 bo‘lim mavjud.
Ta’lim-tarbiya va o‘quv jarayoni 333 nafar mutaxassis, jumladan, 21 nafar fan doktori, professor, 56 nafar fan nomzodi, dotsent tomonidan olib borilmoqda.
5 ta o‘quv binosi, 2 ta talabalar turar joyi, 2 ta oshxona va axborot-resurs markazi, manej, boks, taekvondo, yozgi va qishki suzish havzalari, gimnastika va sport gimnastika, og‘ir atletika zallari, tennis, nayza uloqtirish maydonlari, futbol o‘yingohi faoliyat ko‘rsatmoqda.
Kelajakda universitet hududida 1 600 o‘ringa mo‘ljallangan talabalar turar joyi, 600 o‘rinli o‘quv binosiga ega bo‘lgan gimnastika zali, 3 ta sport inshooti qurib bitkazish hamda futbol maydoni va uning ma’muriy binosini qayta rekonstruksiya qilish rejalashtirilgan.
O‘zAning qayd etishicha, oliygoh bugungi kunga qadar 30 mingga yaqin oliy ma’lumotli mutaxassis tayyorlagan.