Mo‘g‘uliston poytaxti Ulan-Batorda “Iqlim o‘zgarishiga moslashish vositasi sifatida o‘rmonlar va o‘rmon daraxtlarining mahalliy ekotiplari manbalarini rivojlantirish istiqbollari” mavzusida haftalik o‘tkazilmoqda. Bu haqda “Daryo”ga O‘rmon xo‘jaligi davlat qo‘mitasi mutasaddilari ma’lum qildi.
BMT Oziq-ovqat va qishloq xo‘jaligi tashkiloti (FAO) hamda qator xalqaro tashkilotlar tomonidan o‘tkazilayotgan mazkur haftalikda dunyoning 10 dan ortiq davlati, jumladan, O‘zbekiston vakillari ham ishtirok etmoqda.
Haftalik doirasidagi seminarlarda ishtirokchilar sayyorada faol va sog‘lom turmush tarzi uchun zarur bo‘ladigan yuqori sifatli va xavfsiz mahsulotlar yetishtirish, tabiiy, xususan, yer, suv, havo, iqlim va genetik resurslarni barqaror boshqarish, ulardan samarali foydalanish kabi muhim masalalar yuzasidan ma’ruzalar va loyihalar taqdimotini amalga oshirmoqda.
Tadbirda O‘rmon xo‘jaligi davlat qo‘mitasi boshqarma boshliqlari Farrux Fazliyev va Mansur Rahmatullayevning “O‘zgarib borayotgan iqlim sharoitlarida O‘zbekiston o‘rmon genetik resurslari holati” mavzusidagi taqdimoti mutaxassislarda qiziqish uyg‘otdi.
Haftalik 15-sentabr kuni yakuniga yetadi.
Izoh (0)