Мўғулистон пойтахти Улан-Баторда «Иқлим ўзгаришига мослашиш воситаси сифатида ўрмонлар ва ўрмон дарахтларининг маҳаллий экотиплари манбаларини ривожлантириш истиқболлари» мавзусида ҳафталик ўтказилмоқда. Бу ҳақда «Дарё»га Ўрмон хўжалиги давлат қўмитаси мутасаддилари маълум қилди.
БМТ Озиқ-овқат ва қишлоқ хўжалиги ташкилоти (FAO) ҳамда қатор халқаро ташкилотлар томонидан ўтказилаётган мазкур ҳафталикда дунёнинг 10 дан ортиқ давлати, жумладан, Ўзбекистон вакиллари ҳам иштирок этмоқда.
Ҳафталик доирасидаги семинарларда иштирокчилар сайёрада фаол ва соғлом турмуш тарзи учун зарур бўладиган юқори сифатли ва хавфсиз маҳсулотлар етиштириш, табиий, хусусан, ер, сув, ҳаво, иқлим ва генетик ресурсларни барқарор бошқариш, улардан самарали фойдаланиш каби муҳим масалалар юзасидан маърузалар ва лойиҳалар тақдимотини амалга оширмоқда.
Тадбирда Ўрмон хўжалиги давлат қўмитаси бошқарма бошлиқлари Фаррух Фазлиев ва Мансур Раҳматуллаевнинг «Ўзгариб бораётган иқлим шароитларида Ўзбекистон ўрмон генетик ресурслари ҳолати» мавзусидаги тақдимоти мутахассисларда қизиқиш уйғотди.
Ҳафталик 15 сентябрь куни якунига етади.
Изоҳ (0)