Xalqaro press-klubda O‘zbekiston Prezidenti huzuridagi Fuqarolik jamiyatini rivojlantirish bo‘yicha maslahat kengashi tuzilishi, uning oldida turgan vazifalar, grant mablag‘lari ajratish tartibi, komissiyalar faoliyati, istiqboldagi rejalar xususida ochiq muloqot tashkil etildi. Bu haqda O‘zA xabar berdi.
Prezident Shavkat Mirziyoyevning joriy yil 4-maydagi “Mamlakatni demokratik yangilash jarayonida fuqarolik jamiyati institutlarining rolini tubdan oshirish chora-tadbirlari to‘g‘risida”gi farmoni ijrosi doirasida o‘tkazilgan muloqotda NNTlar hamda fuqarolik jamiyatining boshqa institutlarining roli, ahamiyati, ijtimoiy faolligini oshirish yuzasidan amalga oshirilishi kerak bo‘lgan ishlar muhokama etildi.
Ushbu farmon mamlakatning har tomonlama, jadal rivojlanishida fuqarolik jamiyati institutlari o‘rnini mustahkamlash, ularning davlat hokimiyati va boshqaruvi organlari bilan hamkorligini kuchaytirishda muhim huquqiy asos bo‘ladi.
Joriy yil oxiriga qadar Qoraqalpog‘iston Respublikasi, viloyatlar va Toshkent shahrida nodavlat notijorat tashkilotlarining hududiy ehtiyojlaridan kelib chiqqan holda, bo‘sh turgan va samarali foydalanilmayotgan davlat mulki obyektlari negizida “Nodavlat notijorat tashkilotlari uylari”ni tashkil etish belgilangan edi.
Mazkur binolarga yangi tashkil etilgan, shuningdek, ijtimoiy ahamiyatga ega bo‘lgan sohalarda o‘z faoliyatini amalga oshirayotgan nodavlat notijorat tashkilotlari imtiyoz asosida joylashtirilishi belgilangan.
Bu boradagi ishlarni bajarishda huquqiy asoslar yaratilgan bo‘lsa-da, amaliy ishni paysalga solish, o‘zibo‘larchilikka tashlab qo‘yish yoxud iqtisodiy yetishmovchiliklar sabab ortga surish holatlari kuzatilgan. Ma’lumot berilishicha, birgina Xorazm viloyati Urganch shahrida ana shunday "Do‘stlik va nodavlat notijorat tashkilotlari uyi" foydalanishga topshirildi. Bu loyiha barcha hududlarda amalga oshirilishi rejalashtirilmoqda. Muloqotda bu boradagi tajribani ommalashtirish yuzasidan ma’lumotlar berildi.
Bugungi kunda faoliyat ko‘rsatayotgan 9400 dan ziyod nodavlat notijorat tashkilotining hammasi ham o‘z faoliyatida aholi qatlamiga to‘liq kirib bora olayotgani yo‘q. Bu birgina iqtisodiy muammolar bilan bog‘liq masala emas. O‘z faoliyatini jamoatchilik nazorati asosida tashkil etmaslik, ish jarayonidagi sustkashliklar, faqat davlatdan beriladigan mablag‘larni kutish, amaliy ishlarini ommaviy axborot vositalari orqali targ‘ib eta olmaslik evaziga rivojlanish bo‘lmayotir.
Bu tashkilotlar jismoniy va yuridik shaxslarning huquqlari, qonuniy manfaatlari, demokratik qadriyatlarni himoya qilishda, ijtimoiy, madaniy va ma’rifiy maqsadlarga erishishda muhim ahamiyatga ega. Ammo faoliyatida tizimli muammolarni bartaraf eta olmayapti. Davlat rahbarining yuqorida nomi zikr etilgan farmoni mazkur tashkilotlarning asl faoliyati, imkoniyatlari, ulardan kutilayotgan natijalarni aniq belgilab berdi.
Muloqot davomida nodavlat notijorat tashkilotlarining faoliyatiga to‘sqinlik qilayotgan qator tizimli muammo, kamchiliklar xususida so‘z bordi. Kelgusida qilinishi kerak bo‘lgan ishlar belgilandi va xalqaro tajribalar haqida to‘xtalib o‘tildi.
Izoh (0)