Namangan shahri va tumanlar markazlaridagi madaniyat va istirohat bog‘lari, dam olish maskanlarida “Salomatlikni targ‘ib qilish kunlari” boshlandi. Bu haqda “Daryo”ga viloyat sog‘liqni saqlash boshqarmasi matbuot xizmati ma’lum qildi.
Taniqli shifokor olimlar va malakali mutaxassislar namanganliklarni eng zamonaviy tibbiyot asbob-uskuna va qurilmalari vositasida chuqurlashtirilgan tibbiy ko‘rikdan o‘tkazmoqda.
Jumladan, Respublika ixtisoslashtirilgan urologiya ilmiy-amaliy tibbiyot markazi urologi Abdulla Asadullayev rahbarligidagi poytaxtlik shifokorlar qabuli samarali kechmoqda.
— Ayollar reproduktiv salomatligini yaxshilashga alohida e’tibor qaratyapmiz,—deydi Toshkent vrachlar malakasini oshirish instituti akusher-ginekologi Inobat Rahmonova.— Xotin-qizlarda uchraydigan turli xastaliklar bilan murojaat qilayotganlar ayniqsa ko‘p. Ularga zarur tavsiya va maslahatlarimizni beryapmiz.
Namangan shahridagi Bobur nomli madaniyat va istirohat bog‘ida tashkil etilgan tibbiy tadbirga viloyat ixtisoslashgan davolash-profilaktika muassasalari, oilaviy poliklinikalardan kelgan 200 nafar vrach va 441 nafar hamshira jalb etildi. 13 ta UTT va 21 ta EKG vositasida, laboratoriya tekshiruvlari orqali aholi salomatligi nazoratdan o‘tkazilmoqda.
Targ‘ibot tadbirlari viloyat sil kasalliklariga qarshi kurash dispanseri, viloyat endokrinologiya dispanseri, viloyat OITSga qarshi kurash markazi va boshqa davolash-profilaktika muassasalari vakillari tomonidan tashkil etilmoqda. Shu bilan birga, turli yuqumli kasalliklarni aniqlash maqsadida tibbiy tekshiruvlar olib borilyapti.
— Zamonaviy ko‘chma qurilma o‘rnatilgan ikkita avtomashinada fuqarolar rentgent tekshiruvlaridan o‘tishlari uchun imkoniyat yaratildi. Bir kishida sil kasalligi alomatlari aniqlandi va zudlik bilan davolanishga jo‘natildi,—deydi oliy toifali vrach-rentgolog Kamolxon Hamzayev.
Tibbiy-ijtimoiy tadbir ikki kunga mo‘ljallangan.
Izoh (0)